Itxi

Txirrindularitza

ESPAINIAKO TXAPELKETA

Lourdes Oyarbidek zilarra lortu du erlojupeko proban

EITB.EUS

Movistar taldeko txirrindulari arabarra Sheyla Gutierrez taldekidearen atzetik sailkatu da, 53 segundoko aldearekin. Eider Merino bizkaitarrak laugarren amaitu du proba.

  • Lourdes Oyarbide (ezkerrean), probako irabazlearekin

    Lourdes Oyarbide (ezkerrean), probako irabazlearekin. Argazkia: @RFECiclismo

Murtzian jokatzen ari diren Espainiako Txirrindularitza txapelketek erlojupeko probekin izan dute hitzordua ostiral honetan. Goizean, emakumezkoen txanda izan da elite eta 23 urtez azpiko lasterketa bateratuan.

Yeclan jokatu den proban, Movistar taldeko txirrindulariak jaun eta jabe agertu dira, talde horrek bereganatu baititu sailkapeneko lehen lau postuak. Irabazlea Sheyla Gutierrez errioxarra izan da (28:56), eta haren atzetik sailkatu da Lourdes Oyarbide arabarra. Asparrenekoak garaileak baino 53 segundo gehiago behar izan ditu 21,3 kilometroko ibilbidea betetzeko. Podiumeko hirugarren koska Gloria Rodriguez murtziarrak eskuratu du, Oyarbiderengandik bi segundora.

Podiumetik kanpo bi bizkaitar geratu dira: Eider Merino (Movistar) balmasedarra, laugarren; eta Ziortza Isasi (Eneicat) elorriarra, bosgarren.


Xabier Mikel Azparrentzat, urrea

23 urtez azpiko gizonezkoen lasterketari dagokionez, bertan Xabier Mikel Azparren euskal selekzioko txirrindularia nagusitu da. Iñigo Eloseguik, bestalde, laugarren tokia erdietsi du.