Frantziako Tourra
Frantziako gonbidapenak
Cofidis, IAM Cycling, NetApp-Endura eta Bretagne, Frantziako Tourrera
Erredakzioa
Ez da sorpresarik egon Frantziako Tourra, Paris-Niza eta Dauphiné lasterketetan aritzeko gonbidatutako taldeen artean.
-
Paris helmuga talde gonbidatuentzat. Argazkia: EFE.
ASOk banatutako gonbidapenek ez dute sorpresarik eragin tropelean. Frantziako Tourrean gonbidatuta arituko diren taldeak espero direnak izango dira. Batetik, ASOk Cofidis gonbidatu du, askotan parte hartu duen kalitatezko taldea: Dani Navarro, Jerome Coppel, Rein Taaramäe, Egoitz Garcia... Horrekin batera, Frantziako taldeen kuota Bretagne-Séché Environnement taldearekin osatuko da. Debuta egingo duen taldeak "apoteositzat" hartu du gonbidapena.
Beste bi talde egongo dira Frantziako Tourrean, Bretainiako taldea baino koska bat gorago. IAM Cycling-ek txirrindulari onak ditu taldean, tartean Sylvain Chavanel, Frantziako errepideak sutan jartzeko oso aproposa. NetApp-Endura taldeak, bere aldetik, ondo erakutsi zuen iazko Vueltan lasterketa handi bat lehiatzeko gai dela.
Lau talde hauek dira ASOko beste bi lasterketetan parte hartuko dutenak. Paris-Niza lasterketara Cofidis, IAM Cycling eta Bretagne joango dira. Dauphine Criteriumean, berriz, Cofidis, IAM Cycling eta NetApp egongo dira.
