Frantziako Tourra 2023
14. etapa
Carlos Rodriguezek faboritoak gainditu ditu etapa bereganatzeko
EITB Media
Espainiarrak Vingegaard eta Pogacar aurreratu ditu azken kilometroetan eta bost segundoko aldearekin iritsi da helmugara. Pogacar izan da bigarren eta Vingegaard hirugarren, maillot horia mantenduz.
Albisteak (3)
Carlos Rodriguez espainiarrak irabazi du larunbat honetan Frantziako Tourreko 14. etapa, Morzineko estazio alpinoan amaitu dena, eta hirugarren jarri da sailkapen nagusian. Jonas Vingegaard danimarkarra da liderra, Tadej Pogacar esloveniarrari 10 segundoko aldea aterata.
Txirrindulari espainiarrak bigarren garaipena jarraian eman dio Ineosi, bezperan Grand Colombierren Michal Kwiatkwoski poloniarrak lortutako garaipenaren ondoren, eta Jai Hindley australiarra podiumetik atera du.
Rodriguez (22 urte) sailkapen nagusiko lehen bietatik aldendu da Joux Planeko igoeran, eguneko azken mendatean. 17 segundoko atzerapenarekin heldu da, baina jaitsieran bat egin du faborito biekin eta berehala eraso die, 5 segundoko aldea lortuz helmugan. Hala, Pello Bilbaoren eta Jon Izaguirreren ondoren, espainiar baten hirugarren garaipena sinatu du.
Hindley ere Joux Planeko igoeran geratu da, eta 1:46ko atzerapenarekin helmugaratu da. Horri 10 segundoko gainsaria gehitu behar zaio espainiarraren garaipenagatik eta beste bi azken mendatearen gailurragatik. Ondorioz, segundo bat atera dio sailkapen nagusian.
Maillot horiaren lehian, Pogacarrek Joux Planeko gailurretik 5 kilometrora jo du erasoa, baina ez du inoiz 6 segundo baino gehiagoko aldea lortu, danimarkarrak bi kilometro falta zirenean harrapatu duen arte. Berriro saiatu da metro batzuk falta zirenean, baina motor batek eragotzi dio erasoa. Azkenean, danimarkarra izan da gailurrean urrundu duena, eta horrek 8 segundoko gainsaria eman dio, esloveniarraren 5 segundoko gainsariarekin alderatuz.
Jaitsieran ere presioa sartzen saiatu da, baina danimarkarra bere gurpilean itsatsi da eta azken esprintera arte ez dio utzi.
Jardunaldi gogor baten amaieran, lehen mailako hiru mendate eta mendate berezi batekin, eta bi faboritoen taldeak gogor lan eginda, danimarkarrak segundo bat gehiagoko aldea ateratzea lortu du.
