'Zekena', Juan Luis Galiardo protagonista duen lana, Bilboko Arriagan

Zekena antzezlana hartuko du datozen egunotan Bilboko Arriaga Antzokiak. Moliére Frantziako dramagile ezagunaren klasikoaren bertsio modernoa da Bizkaiko hiriburuan ikusgai izango duguna.

Jorge Lavelli dugu lan honetan zuzendaria, eta Juan Luis Galiardo aktore ezaguna da protagonista. Taula gainean 13 aktore izango dira guztira: Juan Luis Galiardo, Carmen Alvarez, Manuel Brun, Manolo Caro, Manuel ElIas, Palmira Ferrer, Javier Lara, Mario Martín, Walter May, Rafael Ortiz, Irene Ruiz, Tomas Saez eta Aida Villar.

Bost ekitalditan banatutako prosa komedia dugu Zekena. 1968an sortu zuen Jean-Baptiste Poquelin (Molière) Frantziako aktore eta dramagile ezagunak. Parisen girotutako istorioa kontatzen digu. Harpagon da bertan protagonista, gizon aberats eta zekena. 10.000 ezkutu gordetzen dituen kutxatila du Harpagonek lorategian ezkutatuta, eta erabat ikaratuta bizi da, norbaitek lapurtuko ote dion beldurrarekin. Ez da inorengan fidatzen, ezta seme-alabengan ere: Elisa alaba Valeriorekin maiteminduta dago, aitarentzat lan egiten duen Napoliko aitoren semearekin. Cleantes da Harpagonen semea, eta ondasunik ez duen Mariana umezurtzarekin ezkondu nahi du. Dirutza mantentzeaz gain, Harpagonek Marina esposatu nahi du, eta alaba Anselmo agurearekin ezkondu.

Lavellik Arriagan aurkeztuko duen bertsio berri honek unibertso erabat modernoa ekarriko digu, klasikoaren moldaketa berritu batekin. Txikienak izango dira lanaz gozatzen lehenak. Urriaren 26tik 28ra haurrentzako emanaldiak egongo dira, 11:00etan. Helduek, aldiz, hilaren 28tik 31ra bitartean izango dute lana ikusgai Arriagan (urriaren 28an, 29an eta 30ean, 20:00etan; eta 19:00etan, urriaren 31an).

Sarreren prezioa 6,40 eta 21 euro bitartekoa da, eta Arriaga Antzokiko leihatiletan, teatroarriaga.com webgunean, 944 310 310 telefono zenbakian eta BBKren orotarako kutxazainetan daude salgai.