Artea
'NO, Global Tour'
'EZ' hitz beltz erraldoia ekarri du Santiago Sierra artistak Artiumera
Erredakzioa
Gasteizko museoaren kanpoaldean kokatu dute 3,20 metro altu eta 4 metro zabal den eskultura. Ezetza interpretatzeko deialdia egin die artistak bisitariei.
Santiago Sierra artista madrildarrak NO, Global Tour lana ekarri du Gasteizko Artium museora. ''''Ez'''' dioen eskultura erraldoia da instalazio honen oinarria. Artelana 3,20 metro altu eta 4 metro zabal da, eta tona erdiko pisua du. Museoaren kanpoaldean kokatu dute Sierraren lana, eta maiatzaren 1a arte egongo da ikusgai.
''''Sistematik erabat kanpo'''' kokatzen du Santiago Sierrak bere burua, eta ''''iraultzaile izatera jolasteko asmorik'''' ez duela ere aitortu du. Ikusleen esku utzi nahi du pieza honen esanahiaren interpretazioa. Hainbat herrialdetan egon da lana ikusgai, eta egileak berak azpimarratu duenez, esanahi ezberdina eman diote lekuaren arabera.
NO, Global Tour artelanaren bidaia
2009ko udan ekin zion bidaiari NO, Global Tour lanak. Italian, Lucca hirian, hasita, kamioi baten plataforman egin du bidaia eskultura erraldoiak. Europako, Estatu Batuetako, Kanadako eta Japoniako hainbat hiritan egon da eskultura, eta leku adierazgarri ugari ere bisitatu ditu, tartean Wall Street, Rockefeller Center-a, NBEren eraikina eta Europar Batasunaren Maastrichteko egoitza.
Ibilbidea, 20 argazkitan
Artelanak hiri horietatik egindako ibilbidea argazkia bildu dute, eta irudi horiek erakusketa batean bildu dituzte. Marmol zurian egindako ''EZ'' erraldoia ere ekarri du artistak Gasteizera, eta Artiumeko bilduman geratuko da.
Santiago Sierrak ezetz esan zion Arte Plastikoen Sari Nazionalari
2010ean, Arte Plastikoen Sari Nazionala hartzeko aukeratu zuen epaimahaiak Santiago Sierrari, baina artistak ezezkoa eman zion sariari. Erabaki honi buruz galdetuta, Sierrak erantzun du beti sentitu izan duela lotsa gustuko dituen artistak telebistan agintariei esku ematen ikusita. ''''Nik ezin dut hori egin. Sentitzen dut, saria 30.000 euro direlako; baina ezin naiz telebistan agertu gogoko ez dudan jendeari esku ematen'''', gaineratu du.
