Bertsolaritza
Aurrerapena
Dozena erdi bertso-saiotako ale aukeratuak, Hitzetik Hortzeran
Erredakzioa
BertsoDinnereko lehiaketaren aurreneko erantzunak ere erakutsiko dituzte eta Araba eta Nafarroako Txapelketen berri ere emango dute.
Egoitz Aizpuru Sanz gai jartzaile oñatiarra hartuko du mahai bueltan asteon Jon Artano Izetak. Egoitzek Gaijartzailea Emagin izeneko hitzaldia eman du Bertsolamintzaren baitan eta mamitutako teoriak azalduko ditu platoan, adibide eta guzti.
Bertsolamintza Durangoko eta Villabonako saio esperimentalek itxi dute hurrengora arte. Egoitz Aizpururen esanetara burutsu eta umoretsu kantatu zuten Ainhoa Agirreazaldegik, Onintza Enbeitak eta Jon Maiak Plateruenan. Villabonako Gurea aretoan ere izan zen gogoetatik eta umoretik hitzaldien, eta bazkariaren, osteko bertso saioan. Beñat Gaztelumendi bertsokideei epitafioak asmatuz jarri zuten eta erakutsiko dute zer kantatu zien Amets Arzalusi, Uxue Alberdiri eta Imanol Lazkanori, baita hiru horiek nola erantzun zioten ere.
Araba eta Nafarroako Txapelketen berri ere emango dute. Bera eta Zigoitiko finalerdietako laburpen bana emango dute. Jon Barberenak lortu zuen finalerako txartela Beran; eta Manex Agirrek Zigoitian.
Asteko 'Jasotako'a Itziartik igorri dute. Bertako Bikain jatetxean Jon Maia eta Unai Iturriaga bata bestearen larrutik kantari jarri zituen Unai Guijarrok, eta gaixto aritu ziren bertsolariak. Bertso pare mundiala erakutsiko dute handik. Belfasteko Bertso Dinner-era joateko lehiaketa ere martxan da. Eta hasi dira Amets Arzallusek eta Andoni Egañak jarritako puntuei erantzunaz bertsozalen bideoak iristen, lehenbizikoak erakutsiko dituzte.
BertsoDinnera
Apirilaren 30ean izango da BertsoDinnera Belfasten. Lehiaketan parte hartzeko bertsodinner@eitb.com helbidera bidali behar dira bideoak. HHk facebooken duen txokoan ere zintzilikatu daitezke edo posta arruntez bidali (Bertso Dinner Lehiaketa. Hitzetik Hortzera. Miramon Pasealekua 172, 20.014 Donostia). Argibideak 943011684 eta 943011685 telefonoetan.
Zuri-beltzekoan Balendin Enbeita udaberriari txio-liroka, 1974ko neguan Donostian egindako kantaldi batetik. Eta Zappingean 1993ra arte egingo dute jauzi. Zestoako bainuetxean egin zen aurreneko Bertsolamintzako une berezienetakoa. Bertsozale askok oraindik gogoan izango dute Jon Sarasuak eta Andoni Egañak egindako dueto harrigarria. Aretxabaltarra zarauztarraren kantuari lotu zitzaion honen ezpainak irakurriz.
Hitzetik Hortzera: Igandean, 21:00etan, ETB-1en. Eta bezperatik ikusgai eitb.com-en.
