Bertsolaritza
Gasteizko Principal Antzokian
Manex Agirre nagusitu da Arabako Bertsolari Txapelketaren finalean
Erredakzioa
Aramaiotarrak 626 puntu eskuratu ditu. Bigarren postua Asier Otamendirentzat izan da (610 puntu). Bertsozaleen Elkartearen arabera, inoizko finalik jendetsuena izan da aurtengoa.
Manex Agirrek txapela jantzi du larunbat arratsaldean Gasteizko Principal Antzokian izandako Arabako Bertsolari Txapelketaren finalean. Aramaiotarrak 626 puntu lortu zituen, Asier Otamendi garaitu eta gero (610 puntu). Iñaki Murua Bertsozale elkarteko lehendakariak eta Blanca Gomez de Segura artisauaren eskutik eskuratu zuen txapela eta oroigarria.
Gai-jartzaile lanetan Idoia Beitia aritu zen, eta Lierni Altuna izan zen finaleko aurkezlea. Hodei Lopez de Arkaute, Patxi Aizpurua, Ekaitz Elorriaga, Mikel Fernandez de Arroiabe eta Iker Elexpuru izan ziren epaileak.
Otsailean ekin zioten 2011ko Arabako Bertsolari Txapelketari, eta, bost kanporaketa eta hiru finalerdiren ondoren, sei bertsolari iritis ziren Gasteizko final handira.
Bertsozaleen Elkarteak jakitera eman duenez, finalaz gozatzeko Gasteizko Principal Antzokiaren sarrerak agortu egin ziren. Honen arabera, inoizko finalik jendetsuena izan da aurtengoa. Izan ere, 800 lagun baino gehiago bildu ziren bertan eta bertsozale bat edo beste kalean geratu zen.
Sailkapen osoa
1. Manex Agirre: 626 puntu
2. Asier Otamendi: 610,5 puntu
3. Oihane Perea: 413 puntu
4. Ander Solozabal: 401,5 puntu
5. Iñaki Viñaspre: 392,5 puntu
6. Zigor Enbeita: 390 puntu
