EITBko Euskara Zerbitzuak euskara batura ekarri du "Abdelkader" pastoralaren testua

Abdelkader pastorala 2021eko uztailaren 25ean eta 30ean eta abuztuaren 1ean eta 8an antzeztu zuten Ürrüstoi-Larrabileko herritarrek, eta urtero legez Euskal Telebistak zuzenean grabatu zuen. Ohikoa denez, Euskal Telebistak 2022ko Aste Santuan eskainiko du pastorala bere lehen kanaletik, hain zuzen ere ostiralean, apirilak 15, 10:00etatik 13:00etara. Emankizunean, euskara batuko azpidatziak eskainiko dira, eta testu osoa, zubererako eta batuko bertsioekin, EITBren webgunean aurki daiteke, www.eitb.eus/eu/kultura helbidean.

Pastoralaren testua Jean-Louis Davant idazle eta euskaltzain zuberotarrak ondu du, aljeriar nazioaren aita dena gaitzat hartuta. Abdelkader ez da azken urteetan Davantek prestaturiko bakarra. Aipagarria da 2013an Sohütako herritarrek René Cassin Bakearen Nobel saridun baionarrari buruz antzezturikoa, eta ezin ahaztukoa 2004an Maulen taularatu zuten Antso Handia, Antso III.a Nafarroako erregeari buruzko trajeria.

Pentsa liteke Abdelkader emirrak ez duela zerikusirik ez Zuberoarekin ez Euskal Herriarekin, eta, beraz, gai arrotza dela pastoral baterako. Davantek berak ohartarazi bezala, zerikusirik ez izatea egia balitz ere, ez litzateke eragozpen izango pastoral bateko heroi bihurtzeko. Baina «euskaldunen historia Euskal Herrikoa baino anitzez zabalago da», dio Davantek. Gizon euskaldun askok euren gaztaroko unerik onenak eman zituzten Aljeriako gerran Frantziako armadako soldadu gisa, eta ehun eta hiruk, bizia galdu. Horietatik, hogeita bi zuberotarrak ziren. Davantek uste du garaia dela zibilizazioen arteko gurutzadak atzean utzi eta «elkarrekin mundu hobe baten eraikitzeko», eta pentsamendu hori bertso bihurtu du Abdelkader pastoralean.