Literatura
Saria
Espainiako Kritikaren Saria, Bernardo Atxaga eta Joxan Artzerentzat
Erredakzioa
Atxagari "Nevadako Egunak" lanagatik eman diote saria, eta usurbildar poetari, berriz, "Heriotzarenataria dugu bizitza" - "Bizitzaren atea dukegu heriotza" poesía lan bikoitzagatik.
-
Atxagak eta Artzek jaso dute saria, euskarazko ekoizpenari dagokionez. Argazkia: EiTB.
"Nevadako Egunak" Bernardo Atxagaren lanari eman diote gaur Espainiako Kritikaren Sari Nazionala, euskarazko narratibaren atalean. Kronika eta fikzioa biltzen dituen lana Nevadan (AEB) 2007eta 200an egindako egonaldian sortu zuen asteasuar idazleak.
Logroñon bildu da gaur literatur sari hauek banatzen dituen epaimahaia; Estatuko lau hizkuntza ofizialetako ekoizpen literarioari begiratzen diote sariketa honetan. Jon Kortazarrek epaimahaiaren izenean esan duenez, "Nevadako egunak" Atxagaren inoizko lan pertsonalenetakoa da, "autobiografiatik fikziora bere esperientzian oinarrituta igarotzen baita".
Horrez gain, Joxan Artze ere saritu dute, poesiaren atalean, "Heriotzaren ataria dugu bizitza" - "Bizitzaren atea dukegu heriotza" lan bikoitzagatik.
1969an hasi zen poesiagintzan Artze, eta abangoardiaren ikur izan da beti euskal literaturan. Kortazarrek azpimarratu duenez, "tonu aforistikoan heriotzaz eta bizitzaz egindako hausnarketa freskoa da lana, eta mistizismorantz jotzen duen poesia humanistikoa darie lerrooi".
Gaztelaniaz, Rafael Chirbesek eraman du saria, eleberrigintzaren sailean, "En la orilla" lanagatik, eta Antonio Hernandezentzat izan da poesiakoa "Nueva York después de muerto" lanagatik.
Katalanez, sariak "Dos taüts negres i dos de blancs" (Pep Coll) eta "Alba del vespre" (Carles Duarte) lanek merezi izan dituzte, epaimahaiaren aburuz, eleberrigintzan eta poesian hurrenez hurren.
Galizierazko sariak "A lúa da colleita" (Anxos Sumai) eleberriak eta "Raíz da fenda" (Berta Dávila) poema liburuak eraman dituzte.
