Musika
Kontzertua
Elton John BECen ikusteko sarrerak salgai daude
Natxo Velez | eitb.com
Musikari britainiarrak azaroaren 2an emango duen kontzertuan egoteko sarreren salneurria 63 eta 102 euro artekoa da, eta Misternentradas eta Live Nation webetan eros daitezke.
-
Elton John, 2012ko emanaldi batean. Argazkia: Efe.
Sir Elton Johnen jarraitzaileek musikaria azaroaren 2an BECeko agertoki gainean ikusteko sarrera eros dezakete honezkero, Interneten; Bizkaiko erakustazokaren hamargarren urteurrena dela eta antolatu dute musika ikuskizuna.
Ostirala, hilak 25, arte ez dute sarreren salmenta orokorra abian jarriko, baina bi plataformatan, Misterentrada.com-en eta Live Nation enpresaren sarean, erosi ahal dira asteazken eta ostegunean ere. Hilaren 25etik aurrera, Ticketmaster, Entradas.com eta El Corte Ingles bidez ere bereganatu ahal izango dira txartelak.
Sarreron salneurria 63 eta 102 euro artekoa da, banaketa gastuak barne, eta, kontzertuaren aurkezpenean iragarri zuten bezala, bertaratzen diren guztiek eserita ikusiko dute artistaren emanaldia.
Elton Johnek urrezko 35 disko eta platinozko 25 disko lortu ditu, mundu osoan 250 milioi ale salduta, eta musikaren historian inoiz gehien saldu den single-a, "Candle in the wind", berea da. 1969an hasi zuen bere ibilbidea, eta 3.000 zuzeneko baino gehiago egin ditu han-hor-hemen.
