Musika
Kursaalen
Elvis Costellok Donostian joko du ekainaren 6an
Agentziak | Erredakzioa
Musikari ingelesa Kursaaleko auditoriumean izango da, Kursaal Eszenako kontzertuen denboraldi berrian. Sarrerak 39 euroan erosi ahalko dira, ostiraletik, urriak 30, aurrera.
-
Elvis Costello Donostian, 2013ko udan. Argazkia: Efe.
Elvis Costello musikari ingelesa Donostiako Kursaal auditoriumean izango da ekainaren 6an, Kursaal Eszenako kontzertuen denboraldi berrian. “Elvis Costello Detour” Londresko abeslariaren bira 2014ko amaieran jarri zen martxan.
Costello "kontzertu beroak, barru-barrukoak, dibertigarriak eta informalak" eskaintzen ari da biran zehar, antolatzaileen arabera. Errepertorioaren zatirik handiena gitarraren laguntzaz interpretatzen du, baina hainbatetan pianoari heltzen dio, eta, horrela, bere kantarik ezagunenek ere nortasun berria lortzen dute.
Bira honetan, Costellok abestiak interpretatzen dituen bitartean, atzealdean, garai bateko telebista handi baten itxura duen pantaila batean, bere haurtzaroko irudiak, bere musika nahiz kultur eraginen eta bere familiako argazki zaharrak erakusten dira.
Elvis Costello Donostiako Kursaal auditoriumean izango da, beraz, 2016ko ekainaren 6an, 20:00etatik aurrera. Sarrerak, 39 euro prezioan, Kursaal Zentroko leihatilan eta www.kursaal.eus webgunean jarriko dira salgai ostiralean, urriaren 30ean.
