Musika
Urtarrilen 9ra arte
Enjoy Festsek Pop Up Store denda ireki du Bilbon
LUZIA ZUGADI | EITB.EUS
Aldi baterako zabaldu duten denda horretan, Euskal Herriko zenbait musika jaialdietarako sarrerak eros daitezke, banaketa gasturik gabe.
-
Pop up store
Abenduaren 23an ireki zituen ateak, Bilbo erdialdean (Gran Via 30), Pop Up Store dendak, eta urtarrilaren 9ra arte egongo da zabalik (astelehenetik larunbatera, 10:00etatik 20:00etara). Han, besteak beste, Bilbao BBK Live (110 euro), Azkena Rock Festival (90 euro), Donostia Kutxa Kultur Festibala (30 euro) eta BIME Live (45 euro) jaialdietarako bonuak daude salgai, banaketa gasturik gabe.
Halaber, ARF eta Bilbao BBK Live 'Christmas Edition' produktu-sortak daude salgai bertan. Lehenak, besteak beste, tragoxketarako kit bat, kamiseta bat eta bildumazaleentzako bonu berezia biltzen ditu. Bigarrenak, berriz, Ricardo Cavolok diseinatutako izerditakoa, katilu bat, betaurreko batzuk, slipmat bat eta beste hainbat opari jasotzen ditu.
Enjoy Festsek irekitako dendan, State Champsen eta Guns N' Rosesen kontzertuetarako sarrerak ere eskura daitezke, eta edozein jaialdi zein kontzertutarako sarrerak erosterakoan Bizkaiko Kultur Txartela (B motakoa) erabil daiteke.
Gainera, erosle guztiak zozketa batean sartuko dira, eta erosketa egiterakoan sariak izango dituzte horietako askok: meet & greetak edo Bilbao BBK Liverako garraio esklusiboa, esaterako.
