Musika
Uztailak 3-7
Julian Lage, Kenny Barron eta Paquito D'Rivera, Getxoko jazz jaialdian
Agentziak | Erredakzioa
Hiru artistok Andrea Motis eta Madaleine Peyroux jada iragarritakoei batuko zaizkie uztailaren 3tik 7ra egingo duten jaialdian.
-
Kenny Barronek uztailaren 5ean joko du Bizkaiko udalerrian
Kenny Barron pianistak, Paquito D'Rivera klarinete eta saxo jotzaileak eta Julian Lage gitarra jotzaileak Getxoko 43. Jazzaldiaren saio nagusien eskaintza osatu dute, Andrea Motis eta Madeleine Peyroux aurretik iragarritako artistei gehituta. Bizkaiko udalerriko jazzaldiak 16 saio hartuko ditu uztailaren 3tik 7ra, antolatzaileek jakinarazi dutenez.
Uztailaren 4an, Julian Lage (1987, Santa Rosa, Kalifornia) arituko da, "Love Hurts" diskoa aurkezten.
Biharamunean, uztailaren 5ean, Kenny Barron (1943, Philadelphia, AEB) eskarmentu handiko pianistaren txanda izango da; Dizzy Gillespieren boskoteko kidea izan zen, besteak beste.
Azkenik, Paquito D'Riverak (1948, Marianao, Habana) itxiko du Getxoko Jazzaldia, uztailaren 7an. Jazz, bebop eta musika klasiko eta latinoko 30 disko baino gehiago grabatu ditu D'Riverak, eta 12 Grammy sari irabazi ditu. Getxon zazpikotean arituko da, "Cariberian Tour" biran murgilduta. Falla, Albeniz, Rodrigo eta Tarrega konpositoreen piezak eta fado portugaldar onenak latin jazzera moldatzen.
Jazzaldirako sarreren salmenta maiatzaren 2an hasiko da.
