kultura
Ikuskizuna
Gabriel Arestiren bizitza eta lana diziplina anitzeko ikuskizun batean
Hainbat artista batu dira Gabriel Arestiren figuraren inguruko ikuskizun honetan: Andoni Egaña, Ainhoa Alberdi, Alain Urrutia, Rafa Rueda, eta abar.
Bilboko Arriaga antzokiak Gabrielen lekua Gabriel Aresti poeta bilbotarraren figura aldarrikatzen duen ikuskizuna estreinatuko du. Diziplina anitzeko ikuskizuna da, eta hainbat artistak (Andoni Egaña, Ainhoa Alberdi, Iraia Elias, Oier Guillan, Alain Urrutia, Rafa Rueda, Iban Urizar eta Naia Membrillera, besteak beste) hilabeteak eman dituzte lanean, Gabriel Arestiren figuraren inguruan.
Gabriel Aresti kultur elkarteak ekoitzitako lehen ikuskizuna da Gabrielen lekua. Ekainean aurkeztu zuten elkartea, eta Zenbat Gara elkarteak eta euskal idazlearen familiak osatu dute. Ikuskizunaren xedea Gabriel Arestiren lana eta figura ezagutzera emateko. Horren bidez, belaunaldi batzuek hura gogoratzeko aukera izango dute, eta beste batzuek, hura deskubritzeko parada. Arestiren bizitza markatu zuten toki eta gai batzuek protagonismoa hartuko dute lan honetan: Bilbo, Baiona, Arantzazu, atzerria eta euskal kultura eta literatura.
Aresti poliedrikoa ageri da bertan, haurtzarotik euskara ikastea erabaki zuenera arte. Justizia soziala aldarrikatu zuen, hainbat lagunekin lan egin zuen eta euskara batuaren sorreraz kezkatu zen, eta horren ideologia ere agerian utzi dute lan honetan.
Disko-liburua
Estreinaldian, izen bereko disko-liburua salgai jarriko dute, inprimategitik heldu berritan. Puntu beretik abiatzen da, baina eduki eta ikuskizunaren trataera berezia du, Paddy Rekalde, Luigi Anselmi, Hedoi Etxart, Amaia Lasa, Oier Guillan eta Andoni Egaña kolaboratzaileen testuen bidez. Diskoari dagokionez, Rafa Ruedak Arestiren testuak musikatu ditu.
