kultura
Umorea
Ja! Bilbao jaialdiak John Cleese sarituko du
Agentziak | Erredakzioa
Aktore britaniarrak 20.000 euroko BBK Ja! Bilbao 2016 saria eskuratuko du, "umore berritzailera eta satirikora bideratutako ibilbide profesional bikainarengatik".
Ja! Bilbao Umorezko Literaturaren eta Artearen Nazioarteko Jaialdiak John Cleese Monty Python talde britainiar mitikoko kidea sarituko du. Jaialdiak zazpigarren edizioa egingo du irailaren 29tik urriaren 9ra bitartean.
Horrela, antolakuntzak astearte honetan jakinarazi duenez, aktore britaniarrak 20.000 euroko BBK Ja! Bilbao 2016 saria eskuratuko du, "umore berritzailera eta satirikora bideratutako ibilbide profesional bikainarengatik".
John Cleesek (Weston-super-Mare, Somerset, Ingalaterra, 1939) "antzezle, idazle eta pertsona altu (1,95 neurtzen du)" gisa definitzen du bere burua, eta bere izena eta Monty Python talde mitikoarena bereizi ezinak dira.
BBC telebistako "Monty Phyton's Flying Circus" serie ezagunak taldea eta kide guztiak ospetsu bilakatu zituen, umore surrealistari, lotsagabeari eta beltzari esker. Serieko "Ibilkera Lerdoen Ministerioa" sketch enblematikoa ez litzateke gauza bera izango Cleeseren zango luzeak bertan agertu izan ez balira.
Monty Pythonen arrakasta zenbait film luzerekin handitu zen, "Mahai karratuko zaldunak", "Brianen bizitza" edo "Bizitzaren esanahia", besteak beste. Beste lan askoren artean, John Cleese "Fawlty Towers" izeneko 'sitcom' ezagunaren edo "Wanda izeneko arraina" komedia entzunaren protagonista izan zen. Oraindik ere lanean jarraitzen du.
BBK Ja! Bilbao saria Tom Sharpe, Francisco Ibañez, Ismail Kadare, Robert Crumb, Julian Barnes eta Fernando Truebak jaso dute aurretik.
