kultura
Hirugarren edizioa
Komedia eta euskara, Gasteizko FesTValeko protagonistak
Erredakzioa
Gasteizko Telebista eta Irratiko Jaialdia abuztuaren 30etik irailaren 4ra bitartean ospatuko da. Estatuko telebista-edukien zita bezala sendotzea du helburu.
FesTVal Telebista eta Irratiko jaialdiaren hirugarren edizioa abuztuaren 30etik irailaren 4ra bitartean ospatuko da Gasteizen. Jaialdiak euskara eta komediaren erabilera komunikabideetan aldarrikatuko du.
Joseba Fiestras jaialdiko zuzendariak eta Maite Berrocal Gasteizko Udalaren Kultura sailburuak jaialdiko nobedadeak aurkeztu dituzte prentsaurrekoan. Estatuko telebista zita bezala sendotzea du helburu, esan dutenez. Proiekzioak Guridi zineman izango dira eta Antzoki Nagusian inaugurazio eta amaiera ekitaldiak izango dira.
Estatu espainiarreko ekoiztetxe nagusiek jaialdian parte hartuko dute eta beste urte batez, EITBk anfitrioi lana egingo du.
Inaugurazio zein klausura ekitaldiek umorea gai nagusi izango dute eta bakarrizketa komikoak Alde Zaharreko lekurik zabaletan egingo dira.
Jaialdiko lehenengo liburuaren aurkezpena eta edizioa izango da nobedadeetako bat. Liburuak telebistaren iraganari, orainari eta geroaldiari buruz hitz egiten du eta telebistako profesionalik garrantzitsuenetarikoek parte hartu dute.
Eiken Euskadiko Ikusentzunezko Klusterrak, ''Eiken Bank, Banco de Ideas'' proiektuarekin jaialdian parte hartuko du. Horrela, ''Fresh Eiken Bank'' jaio da eta bertan aurkeztutako proiektuak, profesionalen eta talentu berrien arteko lankidetzaren emaitza izango dira.
