Publizitatea
Itxi

2020/06/03

15:37

kultura

Koronabirusa

Arriaga ekainaren 17an irekiko dute berriro 19 ikuskizuneko programazio berriarekin

agentziak | erredakzioa

Edukiera murriztu egingo da, eta gehienez 246 eserleku jarriko dira salgai, aurrez esleituta eta antzoki osoan banatuta.

  • Arriaga Antzokia. Argazkia: Begoña Barrutia

    Arriaga Antzokia. Argazkia: Begoña Barrutia

  • Whatsapp
  • Whatsapp
  • Telegram
  • Bidali

Bilboko Arriaga antzokia ekainaren 17an irekiko dute berriro, koronabirusagatik hiru hilabete eta bost egun itxita egon ostean, eta 19 ikuskizun eskainiko ditu uztailaren 23ra arte.

Juan Mari Aburto Bilboko alkatea Arriaga antzokiko Administrazio Kontseiluaren buru izan da gaur goizean. Bertan, sailburuek programazio berezi honen berri izan dute, eta Arriagatik jakitera eman dutenez, "testuinguru zail bati erantzuteko” sortutako programazioa da, eta “argi eta garbi adierazten du Udalak eta Arriaga Antzokiak berak bertako sortzaile eta artistekin duten konpromisoa, baita gure kultur sarea bultzatzeko asmo irmoa ere".

Bilbao Uda 2020 udal ekimenaren baitan, Arriagak oihala altxatuko du berriro, "inguruabarretara egokituz". Horretarako, higiene neurrien protokolo bat prestatu du, Arriagara joaten diren pertsona guztien segurtasuna uneoro bermatuko duena, bai publikoarena, bai artista eta langileena.

Edukiera murriztu egingo da, eta aurrez esleitutako eta antzoki osoan zehar banatutako 246 eserleku jarriko dira salgai, uneoro pertsonen arteko distantzia fisikoa manten dadin. Bilboko antzokitik zehaztu dutenez, kopuru hori aurrerago alda liteke, gertaeren eta osasun gomendioen arabera.

Beste neurri batzuk garbiketarekin, sarbideen antolaketarekin, antzokiaren seinaleekin eta gune komunetatik igarotzearekin zerikusia dute.

Arriaga Antzokiaren irekiera Joaquin Achucarro "maisu handiak" egingo du, joan den igandean, maiatzaren 31n, Arriaga Antzokiaren 130. urteurrena ospatzeko kontzertua eskaini behar baitzuen. Baina ekainaren 17an izango da bere emanaldiaz gozatzeko aukera, Bach, Beethoven, Brahms eta Liszten obren bidez.

Achucarroren emanalditik aurrera, beste 18 ikuskizun, guztiak data bakarrekoak eta 19: 30ean hasita, taularatuko dituzte, bost asteko epean, uztailaren 23ra arte.

Ekoizpen propioko sei ikuskizun programatu ditu Bilboko antzokiak, horietako lau Calixto Bieito Arriaga antzokiko zuzendari artistikoarenak. Horietako bi Asier Polo Txelistarena (uztailak 2) eta Jone Martinez sopranoak eta Maite Maruri mezzoak Pasammezo Antico talde barrokoarekin (uztailak 8) emango dituzten kontzertuak izango dira.

Bieitok zuzendutako 'Gabriel Arestiren etxea defendatuko dut' (uztailak 9) poema-ikuskizuna ere eskainiko da. Gabriel Arestiren poemei egindako omenaldia izango da, euskaraz eta gaztelaniaz, Miren Gaztañaga, Itxaso Quintana, Mikel Losada eta Gabriel Ocinaren ahotsekin.

Azkenik, uztailaren 14an Bieitok berak 'Tiempos de Cabaret y Cambalache' zuzenduko du Gurutze Beitiarekin, antzerki-kabaret ikuskizuna, Iñaki Marurik pianoan eta Jon Freskok perkusioan lagunduta.

Arriagaren beste bi ekoizpenei dagokienez, ikusleek Lucia Lacarra ikusi ahal izango dute. Matthew Goldingekin batera 'Reencuentro en danza' ikuskizuna interpretatuko dute uztailaren 7an, Tchaikovski edo Vivaldiren musikak Petipa edo Edwaard Liangen koreografiekin eta Bilbao Sinfonietta taldearen zuzeneko musikarekin uztartuz.

Bestalde, Bernardo Atxagak 'Pange lingua, voglio una pizza' lana estreinatuko du uztailaren 21ean. ‘Pange lingua’ Atxagak txikitatik bere jaioterrian entzuten zuen otoitz bat zen, elizan oraindik latina erabiltzen zenean, eta ‘Voglio una pizza’ poema bufo baten izenburua da, berak argitaratu zuena esperientzia erlijioso hartatik berrogeita hamar bat urtera.

Antzerkia eta musika

Antzerkiaren atalean, 'Ez dok hiru'ren bertsio akustikoa ikusi ahal izango da euskaraz, Patxo Telleria eta Mikel Martinezekin, ekainaren 18an, eta Aitziber Garmendiak Marta Gonzalez de Vegaren 'Txanogorritxotik otso emera (sei mutil medio)' interpretatuko du, ekainaren 25ean.

Bestalde, Itziar Lazkanok eta Ramon Bareak 'Hoy, última función' antzeztuko dute (ekainak 24), eta 'Desfasando que es gerundio' (ekainak 30) Lalúlú Teatroren (Sol Maguna, Maribel Salas eta Gemma Martinez) ikuskizun berria estreinatuko dute.

Ramon Bareak errepikatu egingo du, baina oraingoan zuzendari gisa, Olatz Ganboa eta Diego Perez protagonista dituen 'Ay, Carmela!' Lanean, uztailaren. Uztailaren 22an, berriz, Juan Pañosek 'Ramper, vida y muerte de un payaso' antzeztuko du, Imanol Ituiñok idatzi eta zuzendutako bakarrizketa.

Bestalde, Bilbao Orkestra Sinfonikoarekin (BOS) elkarlanean, ganbera-musikako bi kontzertu eskainiko dira, bata Guridirena, ekainaren 19an, BOSeko bi harizko laukotek interpretatutako hainbat piezarekin, eta bestea Beethovenena, ekainaren 26an, beste harizko laukote batekin eta BOSeko haizezko eta harizko zazpiko batekin.

Horrez gain, ekainaren 23an Vanessa Goikoetxeak eta Mikeldi Atxalandabasok lehen aldiz partekatuko dute agertokia Usandizaga, Guridi, Sorozabal eta Arrietaren zarzuela, erromantze eta bikote saioak eskaintzeko.

Uztailaren 1ean, Alicia Amo sopranoak Beethoven, Schubert eta Mendelssohni eskainitako bloke baten errezitaldia eskainiko du, eta bigarren zati batean doinu sefardiak interpretatuko ditu.

Gainera, uztailaren 15ean Andeka Gorrotxategi tenoreak bere ahotsa eta presentzia jarriko dio euskal eta italiar kantu sorta bati. Zarzuela, opera, aria eta erromantzeak ere interpretatuko ditu kontzertu horretan. Hiru musika hitzordu horiek Ruben Fernandez Agirre maisuaren ekarpena izango dute pianoan.

Amaitzeko, uztailaren 23an, Eñaut Elorrieta Arriagara itzuliko da, iazko abenduan 'Irteera argiak' diskoa aurkeztu ostean.

Sarrerak

Programatutako ikuskizun guztietarako sarrerak ostegunetik, ekainaren 4tik, aurrera egongo dira salgai Arriaga Antzokiaren webgunean edo leihatiletan, eta indarrean dauden osasun-arauak betetzen direla bermatzeko egokitu eta seinalizatuko dira.

Sarrerek 15 euroko kostu bakarra dute (12 Arriagaren lagunentzat), eta hiru ikuskizunetarako bonoa 30 euroko prezioan erosteko aukera eskaintzen da.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, Osasun Batzordearen telefonora dei dezakezu: 948 290 290. Gogoratu, COVID-19a ez hedatzeko modurik eraginkorrena eskuak sarri garbitzea dela; ahoa estaltzeko maskarak derrigorrezkoak dira garraio publikoan, baita kalean eta leku itxietan ere, bi metroko segurtasun-tartea bermatu ezin bada.
  • Bisitatuena

      Kargatzen ikusiena
      Kargatzen ikusiena