'Encontrarás dragones' eta 'Sin compromiso', zinema pantailetan

Oscarren oihartzunek zinema-pantailetara heltzen jarraituko dute aste honetan. Sin compromiso Ashton Kutcher eta Natalie Portman, Oscar saria irabazi berri duen aktorea, protagonista dituen pelikula da estreinaldi nagusietako bat, eta Inside Job dokumental onenaren Hollywoodeko saria irabazi zuen pelikula ere zinema aretoetara iritsi da.

Aurtengo Oscar sarien banaketa ekitaldiko aurkezleetako bat ere lan berriarekin dugu bueltan. James Francok Howl pelikula estreinatuko du aste honetan, Allen Ginsberg Estatu Batuetako olerkari polemikoaren bizitza hizpide duen lana. 50eko hamarkadan ''''beat'''' kulturaren eta 60ko hippie mugimenduen ikonoetako bat izan zen Ginsberg.

Asteko estreinaldien artean aipagarri dugu Encontrarás dragones drama historikoa. Jose Maria Escrivaren gaztaroaren inguruko pelikula egin du oraingoan Roland Joffé (Misioa) zinemagileak.

Sucker Punch Zack Zinder (300) zuzendariaren azken lanak, eta Potiche, mujeres al poder Catherine Deneuve eta Gérard Depardieu aktore ezagunekin François Ozon frantziarrak filmatutako azken pelikulak osatzen dute aste honetako estreinaldien zerrenda.

Bi lagunek posible dute konpromisorik gabeko sexu harremana? Galdera horri erantzuteko asmoarekin Sin compromiso filmean ditugu Natalie Portman eta Ashton Kutcher, Ivan Reitman zinemagilearen zuzendaritzapean.

Orain 25 urte Misioa pelikularekin arrakasta lortu ondoren, bueltan dugu Roland Joffé zuzendari britainiarra. José María Escrivá de Balaguer Opus Deiko sortzailearen gazte garaietan oinarritutako drama historikoa da Encontrarás dragones.

James Franco eta David Strathairn aktoreak ditugu protagonista Howl filmean. Rob Esptein eta Jeffrey Friedman dokumentalgile handiek zuzendu dute Allen Ginsberg Estatu Batuetako idazle polemikoaren bizitzan oinarritutako filma.

Inside Job Charles Ferguson zuzendariaren lanak 2008ko krisi ekonomikoaren arrazoiak aztertzen ditu. Estatu Batuetan, Islandian, Ingalaterran, Frantzian, Singapurren eta Txinan grabatu dute, eta bankarietan, politikoetan, kalifikazio agentzietan, burokrazian eta unibertsitate irakasleetan jarri dute begirada krisiaren jatorria aztertzeko.

François Ozon zinemagile frantziarrak Potiche, mujeres al poder filma estreinatuko du gurean aste honetan. Catherine Deneuve eta Gérard Depardieu ditu bertan protagonista, eta ''''dekorazio objektu'''' gisa hartzen dituzten emakumeen egoera kritikatzen du.

Zack Snyder (300 eta Ga''Hoole) zuzendaria ere Sucker Punch lan berriarekin dugu. Thiller fantastikoa da, eta emakume eder eta borrokalarien istorioa du oinarri. Beren borondatearen kontra, giltzapean sartu dituzte, eta elkarrekin bertatik alde egiteko lanean aritu beharko dira.

Piraña 3D, 80ko hamarkadako kultuzko filmaren bertsio berria,Esta abuela es mi padre&' || 'nbsp; Martin Lawrence eta Brandon T. Jackson aktoreen lana eta Guest Jose Luis Guerinek zuzendutako dokumentala ere badaude aste honetako estreinaldien zerrendan.