Fermin Muguruza saritu dute Bartzelonako In Edit jaialdian

Bartzelonan urriaren 27tik azaroaren 6ra egin duten In Edit nazioarteko jaialdiak aurten saritu dituzten lanen zerrenda eman du. Musikazko zinema dokumentaleko jaialdi horretan, Fermin Muguruzak jaso du aurten estatuko dokumental onenaren saria, 'Next Station: Morocco' lanarekin.

Aurora Morenok, Isaki Lacuestak eta Quim Casasek osatutako epaimahaiak Muguruzaren lan horretan 'gnawa' erritmo tradizional afrikarrak eta gaur egungo hip hop doinuak nahasteko modua nabarmendu du.

Halaber, epaimahaiaren ustez, Marokoko kultur aniztasuna ezin hobeto erakutsi du euskal artistaren lanak, eta dokumentalean azaltzen diren musikarien doinuek herrialde arabiarreko aldaketa politikoan izan duten garrantzia jasotzea lortu du.