Zinema
84. edizioa
'The Artist' film mutua, 2012ko Oscar sarietarakoko faboritoa
Erredakzioa
Hollywoodeko akademiak gaur banatuko ditu Oscar sariak, eta Alberto Iglesias musikagile euskaldunak musika onenaren saria jaso dezake.
Albisteak (2)
Informazio gehiago (1)
Dena prest Oscar sariak emateko ekitaldian, Los Angelesen (AEB), zine munduko urteko ekitaldi garrantzitsu eta jarraituenean. 84. edizioa da aurtengoa eta gala 17.00etan hasiko da (01.00 GMT). 50 estatua banatuko dira eta horietako bat lor dezakete Fernando Truebak ("Chico y Rita) edo Alberto Iglesiasek ("El Topo").
Alberto Iglesias donostiar musikagilea musika onenaren Oscar saria jasotzeko izendatuen artean dago, "El topo" filmeko lanagatik.
Baina paparazzien arreta izar handiek jasoko dute batik bat. Penelope Cruz, Jennifer Lopez, Emma Stone, Angelina Jolie edo Halle Berry, besteak beste.
Hala ere, badirudi aurten protagonismoa gizonezkoetan egongo dela. George Clooney eta Brad Pitt aktoreez gain, Sacha Baron Cohen britainiarra izango da hizpide. Antolakuntzarekin hainbat egunez liskarrak izan ostean, badirudi azkenean lortu duela bere datorren filman ("The Dictator") interpretatzen duen diktadorea bezala jantzita joatea.
3.300 lagun inguru egongo dira antzokian eta Billy Crystal komikoak aurkeztuko du ekitaldia bederatzigarrenez.
Badirudi Michel Hazanaviciusen The Artist filma izango dela garaile, izan ere, hamar izendapen ditu. Irabaziz gero, Frantziako lan batek film onenari saria lortuko lukeen lehen aldia izango litzateke, eta bigarrena, film mutu batek sari potoloena eskuratzen.
Baina lan frantsesa Martin Scorseseren "Las aventuras de Hugo" filmarekin lehiatuko da aurrez aurre, 11 izendapen baititu, eta "Moneyball: arauak apurtzen" lanak 6 ere izendapen ditu.
Zerrenda Alexander Paynek ("Los descendientes") 5 izendapenekin; Terrence Malickek ("El árbol de la vida") 3 izendapenekin; eta Woody Allenek ("Midnight in Paris"), 4 izendapenekin, osatzen dute.
