Abereen ongizateaz erreportajea, 'Teknopolis' saioan

Abereak egoki gobernatzeak errentagarritasuna hobetu dezakeela-eta, ustiaketa industrialetan ere, hasi dira erreparatzen animalien ongizateari. Neiker-Tecnalian abereen ongizatearekin zerikusia duten galderak erantzuten saiatzen dira eta horixe izango da aste honetan 'Teknopolis' erreportajearen gaia. Oiloen portaera baketsuagoa al da taldean denak kolore bereko lumajea dutenean?  Lasai egon daitezen, zenbat oilo jarri behar dira kaiola batean? Zein da ardien estresaren eta esne ekoizpenaren arteko erlazioa?...

Arrabola birtualak izango dira saioaren bigarren gaia. Neguan bizikletan errepidean ibiltzea gogorra denez, txirrindulari asko etxean aritzen da, arraboletan. Baina, jakina, alde handia dago batetik bestera. Teknopolisen erakutsiko dugun arrabolak, etxean bertan ari zarela, birtualki errepidean egoteko aukera ematen dizu. Tolosako Teknifikazio zentroan aplikazio hori erabiltzeko gela berezi bat daukate. Hantxe izan da Nagore Rementeria lankidea xehetasun guztiak biltzen.

Vlog-ean Practice Your Music aplikazioaz arituko dira. Ia denok hasten dugu urte berria asmo politekin: kirola egin, ingeleseko eskolak hartu edo musika-tresna bat jotzen ikasi. 2013ko lehen saioan aurkeztuko dugun aplikazioak, musika-tresnekin saioak egiteko balio du. Practice Your Music du izena, eta zure musika-tresna, alegiazko orkestra batekin jotzeko aukera emango dizu.

'Teknopolis' saioa astelehenean, ETB-1n, 23:10ean izango da ikusgai eta asteazkenean, ETB-2n, 00:15etan.