Iruñeko Punto de Vista zinema jaialdira bisita, 'EITB Kultura' saioan

Punto de Vista Nafarroako Zinema Dokumentaleko Nazioarteko Jaialdiaren berri dakarkigun aste honetan 'EITB Kultura' saioak. Zortzigarren edizioa izango du aurtengoa, eta 17 film lehiatuko dira. Mikel Zatarain donostiarrak Branka izeneko dokumentala aurkeztuko du La región central sailean.

Musikaren alorrean, Getxoko McEnroe taldearen laugarren diskoa nabarmenduko dute, Las orillas. Hamar kantu biltzen dituen lanak taldearen egunerokotasuna erakusten duen dokumental bat ere badakar.

Sleepwalk Collective taldearen El entretenimiento ikuskizun berria ezagutu ondoren, Donostiako Intxaurrondo auzoko kultur etxean sartu irtena egingo dute 'Gernika. Zerrenda amaitu gabea' erakusketa bisitatzeko. Txiki Agirre Keixeta margolariak sarraski hartako biktimak omendu ditu.

'EITB Kultura' gaur gauean, 23:45ean, izango dugu ikusgai ETB-1en eta 01:15ean ETB-2n, eta ostiral gauetan ETB-3n.