Besiktas-Caja Laboral, zuzenean, ETB-1en eta eitb.com-en

Euskal Telebistak Istambuletik zuzenean eskainiko du gaur Besiktas eta Caja Laboral taldeen arteko norgehiagoka, 19:00etatik aurrera. Euroligako Top 16 fasearen hamargarren jardunaldiko partida da eta Xabier de la Fuentek eta Josean Aldalurrek egingo dute emanaldiaren gaineko kontakizuna. eitb.com-eko erabiltzaileek ere, partida zuzenean jarraitzeko aukera izango dute streaming-aren bitartez.

Binakako pilota txapelketa

Horrez gain, Zarauzko pilotalekuarekin bat egingo du saioak 22:00etik aurrera eta bertan jokatuko diren partiden berri emango du zuzenean. Hasteko, Gonzalez-Laskurain eta Julen Retegi-Pascual bikoteen arteko norgehiagoka eskainiko da eta ondoren, binakako pilota txapelketako partida eskainiko da, Bengoetxea VI-Beroiz eta Arretxe II-Begino bikoteen artekoa. Xabier Euzkitzek, Joxean Tolosak eta Koldo Aldalurrek egingo dute partiden gaineko kontakizuna.

Tirreno-Adriatico: 3. etapa

Egunero bezala, Tirreno-Adriatico itzuliarekin bat egingo du Euskal Telebistak, eguerdiko 14:55etik aurrera. Ostiralean, hirugarren etapari ekingo diote txirrindulariek: Indicatore eta Narni Scaloren arteko 198 kilometroko ibilbidea da, eta Xabier Usabiagak eta Fermin Aramendik emango dute etaparen berri zuzenean.