telebista
Gaur
Welter eta super ertain pisuko txapelketa bikainak, 'Boxeo Izarrak'en
A.A.
EiTB
Sakio Bika-Nikola Sjekloca eta Paulie Malignaggi-Pablo Cesar Cano.
Borrokaldi bikainez gozatzeko parada izango dute boxeo zaleek aste honetako 'Boxeo Izarrak' saioan. Hasteko, super ertain kategorian, Munduko txapelketarako kanporaketa egingo dute Sakio Bika kamerundarrak eta Nikola Sjekloca serbiarrak. Bika hiru aldiz saiatu da munduko txapeldun izaten, baina orain arte ez du lortu, eta laugarren aukera nahi luke. Sjeklocak, ostera, ez du txapelketa hori behin ere jokatu, baina bere zenbakiak bikainak dira: 25 neurketa egin eta denak irabazi.
Bigarren norgehiagoka, welter pisuko Munduko txapelketa izango da. Paulie Malignaggi eta Pablo Cesar Cano aurrez aurre. Mexikarra behin izan da munduko tituluaren jabe, eta Estatu Batuetako boxeolaria, berriz, lau aldiz. Biek ere estilo ikusgarria daukate.
'Boxeo Izarrak' saioa gaur izango da ikusgai ETB1en gauerdian, eta larunbatean ETBKn 23:40ean.
