Mikel Goñirekin, osteguneko 'Sanferminak 2013' saioan

Gauero bezala, Xuban Intxaustik eta Lierni Agirrezabalak San Fermin jaietako festa giroarekin bat egingo dute Baluartetik zuzenean. Ostegun honetan, Mikel Goñi pilotaria izango dute gonbidatu. Bere ibilbidea errepasatuko dute, bai pilota munduan baita telebistako zenbait saio arrakastatsuetan ere, horien artean, 'El Conquistador del Fin del Mundo' saioan.

Horrez gain, Iosu Vazquez entzierroetako korrikalari ohia izango dute, eguneko entzierroa komentatzeko eta aztertzeko. Ondoren, Virginia Maraña erreportariak Takonera Pakean izandako bertso saioaren berri emango du, eta zezen plazara joango da bertako giroa nolakoa den erakustera.

Saioak 23:00etan zuzen-zuzenean su artifizialak eskainiko ditu. Nazioarteko lehiaketaren barne, ostegunean, Madrilgo Vulcano S.L. pirotekniaren txanda izango da.

'Sanferminak 2013' ostegun honetan emitituko da 22:15etik aurrera ETB1en.