'Tu Edificio Favorito': bidaia euskal arkitekturan zehar

'Tu Edificio Favorito' saioa estreinatuko du Euskal Telebistak irailean. Africa Baetak gidatuta, Euskal Herriko arkitekturako monumenturik esanguratsuenak lehian jarriko ditu saio honek. Hainbat lagun ezagunek gehien atsegin dituzten eraikinak aurkeztuko dizkigute.

Astero, saioak hiru monumenturen, hiru eraikinen, txoko eta sekretu guztiak erakutsiko dizkigu. Euskal arkitekturako hiru harribitxi aurkeztuko dizkigute astero hiru lagun ezagunek, lehiaketak izango dituen zortzi saioetako bakoitzean. Eta ikus-entzuleek hiru eraikin horietako baten aldeko botoa emateko aukera izango dute.

Saio bakoitzaren ondoren boto gehien jaso duten zortzi eraikinak Final Handira igaroko dira. Saio hau zuzenean emango da eta ikus-entzuleek bertan erabaki beharko dute zein den Euskal Herriko eraikinik onena.

Gromaz etxeak ETBrentzako egindako saioa da hau. 'Tu Plato Favorito' saio arrakastatsua ere etxe horrek egin zuen. Kasu hartan pertsona ezagunek gehien gustatzen zitzaien platera aurkezten zuten eta ondoren ikus-entzuleek aukeratu behar zuten onena zein zen. Kasu honetan dinamika antzerakoa izango da baina Euskal Herriko eraikinak izango dira protagonista.

Kursaal, Arriaga antzokia, Marques de Riscal hotela, Hondarribiko Paradorea, Tuterako Katedrala, Guggenheim museoa, Gasteizko Katedral Zaharra, Biarritzeko Hotel du Palais eta beste hainbat eraikin ezagutu ahal izango ditu ikus-entzuleak saio honi esker. Eta parte hartuko duten pertsona ezagunen artean izango ditugu Juanma Bajo Ulloa, Javier Clemente, Kepa Acero, David Barbero, Ramon Barea, Elena Arzak, Jon Sistiaga, Jose Luis Rebordinos, Mikel Urmeneta, Itziar Atienza, Helena Resano edota Martin Berasategi.