Bengoetxea-Idoate, ETB1en eta eitb.com-en

Kirol hitzordu nagusia du gaur arratsaldean ETB1ek: Lau T'erdiko Txapelketari dagokion pilota emankizuna, zuzenean, eta eitb.com-en ere jarraitu ahal izango dena.

'ETB Kantxa' saioa, ohi denez, 17:00etan hasiko da. Eibarko Astelenako jaialdiak eskaintza hirukoitza dakarkigu: promozio txapelketako bi neurketa,  Victor-Jaka eta Olazabal-Lemuno, eta bien artean, Bengoetxea VI-Idoate, arratsaldeko partida nagusia izango dena. Xabier Euzkitzek, Joxan Tolosak eta Elena Azpeitiak osatuko dute esatari taldea.

ETB1eko kirol eskaintza herri kirolak eta futbolak osatuko dute. 16:00etan aizkolarien Eroski-El Boulevard sariaren nondik norakoak bilduko ditu Koldo Aldalurrek, Joxe Etxebesteren laguntzaz. 19:30etik aurrera, futbol jardunaldiaren analisia eta laburpena egingo du Mikel Olazabalek 'Gol Festa' saioan.

Erremontea eta zesta, ETBKn

20:30ean, halaber, Urriza-San Miguel / Uterga-Juaristi-Barrenetxea IV erremonte partida, eta 21:15ean, zestako Gasteiz sariko finalerdia, Treku-Endika / Egiguren II-Ekhi izango ditugu ikusgai. Iñigo Aiestaran izango da esataria.