'La Noche de…' saioak 'Terminator Salvation' emango du gaur gauean

Gaur gauean, "La Noche de…" saioan, Terminator Salvation filma izango dugu ikusgai, Terminator sagaren laugarren lana, alegia. Christian Bale, Helena Bonham Carter, Bryce Dallas Howard, Sam Worthington eta Michael Ironside dira filmeko aktore nagusiak, eta, harrigarria badirudi ere, ez dago Arnold Schwarzenegger, aktorearen irudia digitalki sortu baitzuten sagaren lehen atalean zuen itxura erakusteko. 22:15etik aurrera, pelikularen grabazioari buruzko xehetasunak ezagutuko ditugu.

Bestalde, eta Nicholas Cage aktorearen 50. urtebetetzea aitzakia gisa hartuta, haren ibilbidea eta horrek izan dituen orrazkera xelebreak errepasatuko ditugu. Estatubatuarraren bizitzaren errepasoa egingo dugu, haren orrazkeren bitartez: aktoreak bere ibilbidearen hasieran zuen rock-itxurako ilajetik hasi, eta azkenaldian buruko soila estaltzeko hautatu dituen orrazkera bitxietaraino.

Gainera, Gazapos de Película atala izango da aste honetan, baita Tu Serie Favorita ere. Azken horretan, Los Simpson telesailaren hasierari eta garapenari buruz hitz egingo dugu.

"La Noche de…" Terminator Salvation, 22:15ean, ETB2n.