Martin Scorseseren zinemarik onena, gaur gauean, ETB2n

Martin Scorsese zinema zuzendari ospetsua ETB2ko protagonista izango da ostegun gauean. Berriro ere guztien ahotan dago zinegilearen azken lana, eta horren aitzakian, Euskal Telebistak haren bi film arrakastatsu eskainiko ditu: Infiltrados eta Uno de los nuestros. Intrigaz beteriko bi pelikulek mafiaren munduan murgilduko dituzte ikus-entzuleak.

Infiltrados ikuslearen arreta osoa eskatzen duen suspense pelikula da, eta aktore oso ezagunek parte hartzen dute: Jack Nicholson, Leonardo DiCaprio eta Matt Damon. Massachussets polizia departamentuak Bostoneko bandarik arriskutsuenarekin amaitu nahi du. Horretarako, Billy Costigan gazte hasiberria Frank Costello boteretsuaren gaizkile taldean infiltratuko dute.

Pixkanaka, Billy gazteak Costelloren konfiantza irabaziko du. Bien bitartean, Colin Sullivan gaztea (Matt Damon) polizia zerbitzuaren barruan kategoriaz igoko dute, Ikerketa Berezien zerbitzuan lanean jarriz. Costelloren jarduera ikertzen duen elitezko talde batek osatzen du zerbitzua. Hala ere, inork ez daki Sullivan beste infiltratu bat dela, Costelorentzat lan egiten duen espioia.

2006an estreinatu zen Inflitrados pelikularekin zuzendari onenaren Urrezko Globoa eta Oscar saria irabazi zituen Scorsesek. Halaber, film, egokitutako gidoi eta muntaia onenaren Oscar sariak lortu zituen.

ETB2k gaur gauean eskainiko du, 22:15etik aurrera.

Ondoren, Uno de los nuestros, benetako istorio batean oinarritutako film jantzia izango da ikusgai; mafiaren zine azpigeneroaren barruan, maisu lana.

Henry Hill gaztearen istorioa kontatzen du. Aita irlandarra eta ama siziliarra ditu, eta Brooklynen bizi da. Bere auzoko gangsterren bizimodua miresten du, eta 13 urterekin, eskola utzi eta Paul Ciceroren taldean hasiko da lanean. Laster irabaziko du bere nagusien konfiantza, geroz eta ardura gehiago lortuz.

Filmak publikoaren eta kritikaren esker ona lortu zituen: bost BAFTA sari, Oscar sarietarako sei izendapen eta Urrezko Globoetan beste bost. Horrez gain, Joe Pescik bigarren aktore onenaren Oscar saria eraman zuen. Percirekin batera, Robert de Niro eta Ray Liotta dira protagonistak.