Elurrezko sumendia eta mindutako oina, aste honetako 'Conquis' saioan

Asteburu honetako programa oso garrantzitsua da, eta apurka-apurka 'El Conquistador del Fin del Mundo' saioko final handirako panorama itxura hartzen doa.

Enekok rodeoaren jokoan Rebekari 'oparitu' zion behitxoa orain arte abenturan bere etsaiek lortu ez dutena lortzear da: bizkaitar polita etxera bidaltzea, hain zuzen ere. Rebekak immunitate jokoa irabazi zuen, baina Hereford arrazako behia oinaren gainean erori zitzaion. Ez dirudi oina hobetu zaionik, eta medikuak Rebeka ospitalera eramatea erabaki du. Hurrengo jokora zer baldintzatan helduko den eta programaren azken txanpa gogor honi bermeekin aurre egiteko gai den ikusiko dugu asteburuan.

Patagoniako fase bateratu honetan ohikoa denez, lehiakideek programako Immunitate Joko klasikoetako bat dute aurretik: Elurrezko sumendia. Piramide itxura duen elurrezko sumendiaren hegal batean pala batekin zuloa egin beharko dute. Barruan dagoen pasabidera heldu, bertatik igo, eta berriz kanpoaldera ateratzea lortu beharko dute. Proban bost lehiakide bakarrik geratzen direla kontuan izanik, jokoa irabaztea edo galtzea oso garrantzitsua izango da 'El Conquistador del Fin del Mundo' saioko hamargarren edizio honetako finalisten izenak ezagutzeko.

Diana eta Sarai, Purgatoriotik 'El Conquis' eztabaida-saiora

Diana, Sarai eta asteburu honetako azken kanporatua izango dira protagonistak larunbat eta igandeetan Patxi Alonsok aurkezten duen debatean. Reality honetan bizi izandako une garrantzitsuenak errepasatzeaz gain, Purgatorioa utzi zuten unea nolakoa izan zan kontatuko digute lehiakide gipuzkoar biek.

Gainera, programako azken fase hau aztertu, ondorengo saioetako aurrerapenak ikusi eta Sarairen eta Dianaren abenturako unerik onenak ikusiko ditugu. Juanito Oiarzabal, David Seco, Gotzon Mantuliz, Isa Landa, Amaia Puertas eta Txispy eztabaida-saioko ohiko analista trebeak ere izango dira Miramongo estudioetan.

Azkenik, ikusleen lehiakide gogokoenaren aukeraketan zeintzuk kanporatu dituzten ere jakingo dugu. EiTBk webgunean egindako aukeraketari esker, orain arte, lau lehiakide geratu dira kanpoan: Patxi, Esti, Irantzu eta Pily.

Ez galdu 'El Conquistador del Fin del Mundo' abentura saioa eta "El Conquis" debatea, larunbatean eta igandean, gaueko "Eguraldia" saioaren ostean, ETB2n.