Txirrindularitza, pilota, saskibaloia eta futbola, zuzenean

Zuzeneko bost kirol emanaldi egingo dituzte Euskal Telebistak eta eitb.com-ek gaur. Italiako Giroa, Eibarko pilota jaialdia, Endesa Liga eta Bigarren Mailako futbola izango dira eguneko arreta gune nagusiak.

Eguneko lehen hitzordua, 12:30ean, Endesa Ligako Laboral Kutxa-Fuenlabrada partida izango dugu. ETBKn eta eitb.com-en izango da ikusgai, Asier Aranguren, Josean Aldalur eta Juan de la Vega esatarien eskutik.

15:00ak baino lehen ekingo dioten Fermin Aramendik eta Xabier Usabiagak Italiako Giroko 15. etaparen kontakizunari ETB1en eta eitb.com-en. Etapa luzeari (225 km) eta menditsuari egin beharko diete aurre txirrindulariek Montecampionera iritsi arte.

Lasterketa amaituta, Eibarko Astelena pilotalekuarekin bat egingo dute ETB1ek eta eitb.com-ek. Mendizabal III-Merino I / Jaka-Pascual partidak zabalduko du jaialdia eta ondoren, Titin III-Cecilio eta Ezkurdia-Rezusta izango dira aurrez aurre. Xabier Euzkitze, Joxan Tolosa eta Elena Azpeitia izango dira berriemaileak.

Albacete-Sestao eta Eibar-Alaves, zuzenean

Bigarren Mailako futbolak ere tarte berezia izango du gaurko programazioan. 18:00etan hasiko den Albacete-Sestao River partida ETBKn eta eitb.com-en jarraitu ahal izango da. Igoera faseko itzulerako partidaren berri emango digu Albacetetik zuzenean Xabier Anduezak. Jose Luis Ribera aditua izango du lagun komentarioetan.

Bestalde, 20:15etik aurrera Ipuruan jokatuko den Eibar-Alaves derbia ETB1en eta eitb.com-en izango da ikusgai. Armaginentzat berebiziko garrantzitsua duen neurketaren inguruko saio berezia lehenago hasiko da, 19:30ean, Txemi Galarragak gidatuta.

Naxari Altuna, Juanan Larrañaga eta Joseba Urkiola arduratuko dira kontakizunaz, eta partida amaitutakoan, 'Zilarrezko Futbola' tarteak ETBKn izango du jarraipena. Bertan, Eibar-Alaves norgehiagoka aztertuko dute eta gainerako emaitzei begira izango dira, armaginek igoera lortzen ote duten jakiteko.

Amaitzeko, ETBKn, Bizkaiko lau T'erdiko txapelketako finala izango da ikusgai 10:20ean; Treku-Del Río / Iturbide-Zabala I zesta punta partida 20:00etan eta Euskadiko trainerila txapelketako laburpena 20:50ean.