Ibanek agur esan dio abenturari Andekaren aurka lehia galduta

Bere bidean jarriko den orori gaina hartzeko asmoz sartu da lehiaketan Andeka, eta Iban izan da bilbotarraren lehen biktima. Egia esan, edonork irabaz zezakeen lehia; sugarrei begiratu ere egin gabe hasi zen soka erretzen gipuzkoarra eta hor galdutako segundoak haren kondena bilakatu ziren ondoren. Garaipen honekin, beraz, Andekak arerio gogorraren irudia indartu baino ez da egin.

Zergatik izendatu du Iban David Secok?

Dena dela, ez dago guztiz argi David Secok zer dela eta izendatu duen Iban. Dirudienez, lehiakideak berak eskatu zion kapitainari arrisku egoeran jartzeko. Ziurrenik, inork ez zuen espero Andekak hura aukeratuko zuenik lehia jokatzeko; Sararen aurka joatea izango zen ohikoena, baina puma taldeko izendatuak indartsuena akabatzen saiatzearen aldeko apustua egin zuen.

Berritasun ugari taldeetan

Hiru talde misto osatuta, taldekide berriak sartuta eta Andreak immunitate jokoan izandako txakalaldi ikaragarriaren ondorioz abentura utzita; horrela abiatu da programaren bigarren fasea.

Bestetik, fase honek ekarri duen beste une gogoangarri bat Layza Fox kanpamentu aberatsean sartzea izan da, Juanitorekin eta Kortarekin batera. Layzak eta bi kapitainek elkarrekin emango dituzten lehen minutuak azken hilabeteotan telebistan ikusi dugun onenetakoa izan da. Juanito paregabe ibili da, eta, batzuetan, gainera, politikoki ez oso zuzen; arabarra bere saltsan dago transformistaren konpainian. Korta, aldiz, ez dago batere eroso horren ezberdina den lagun bat ondoan izanda; hala ere, jarrera mesfidatiena Maixa eta Nai taldekideek erakutsi dute.

‘El Conquistador del Fin del Mundo’ saioko hurrengo ataletan lehiatu beharra dagoenean ikusiko dugu Layzak zer etorkizun izango duen Patagonia gordinean.