Bigarren Mailako futbola eta Endesa Liga, ETB1en eta eitb.eus-en

Futbolak eta saskibaloiak osatuko dute gaurko ETB1ek eta eitb.eus-ek prestatu duten kirol eskaintza.

Lehen emankizuna 16:00etan izango da: Bigarren B Mailako Amorebieta-Real Madrid Castilla neurketa. Xabier Anduezak eta Juanan Larrañagak egingo dute kontakizuna.

Jarraian, Bigarren Mailako Osasuna-Llagostera partida izango da ikusgai. Naxari Altuna eta Iban Bengoetxea izango ditugu esatariak, Juanan Larrañaga lagun dutela.

Azkenik, 21:00etan, Endesa Ligako 21. jardunaldiko Sevilla-Bilbao Basket partidaren berri emango dute Asier Arangurenek eta Josean Aldalurrek.

'Gol Festa' saioa 23:50ean eskainiko da. Bertan, futbol jardunaldiaren errepasoa egingo du Jon Elortzak, eta arreta berezia eskainiko diote Athleticek Granadan jokatuko duen norgehiagokari.