telebista
17:00etan hasita
Zumarragako pilota jaialdia, zuzenean, gaur, ETB1en eta eitb.eus-en
A.A.
EiTB
Lazkaon jokatutako aizkolarien Eusko Label sariko jardunaldia ere eskainiko da.
-
Albisu-Rezusta (lehen mailako Buruz Buruko Txapelketa)
Gaur, jaieguna izanik, arratsaldeko bostetan emango du pilota emankizuna Euskal Telebistak. Zumarragako Beloki pilotalekuko jaialdia eskainiko dute, hain justu, ETB1ek eta eitb.eus-ek. Hiru partida jokatuko dira: Mendizabal III-Urruzola (2. mailako Buruz Buruko Txapelketa), Albisu-Rezusta (lehen mailako Buruz Buruko Txapelketa) eta Aritz Lasa-Merino I / Irribarria-Larrinaga. Xabier Euzkitzek, Joxan Tolosak eta Ibon Gaztañazpik egingo dute kontakizuna.
Pilotaren aurretik, 16:00etan, ETB1en, herri kirolen tartea zabalduko dute, goizean Lazkaon jokatutako aizkolarien Eusko Label sariko saioa eskaintzeko. Larrañaga, Otaegi, Mujika, Jauregi, Irazu eta Saralegi izango dira nor baino nor gehiago. Ibon Gaztañazpi izango dugu esataria, Joxe Etxebesterekin batera.
Bestalde, 22:45, ETB1en, Realak Levanteren aurka jokatutako futbol partidaren laburpena egingo du Iñaki Mikeok.
