telebista
Kirolak
Eibarko pilota jaialdia, gaur, ETB1en eta eitb.eus-en
A.A.
EiTB
Endesa Ligako azken jardunaldiko Dominion Bilbao Basket-Unicaja partida ETB4n eta eitb.eus-en izango da ikusgai.
Eibarko Astelena pilotalekutik egingo da gaur 'ETB Kantxa' saioa. Bertan, hiru partida jokatuko dira: Buruz Buruko Promozio Txapelketako Merino I-Irribarria, eta binakako bi neurketa: Jaunarena-Barriola / Jaka-Zubieta eta Gorka-Urruzola / Mendizabal III-Larrinaga. 17:00etatik aurrera, ETB1en eta eitb.eus-en jarraitu ahal izango da emankizuna, Xabier Euzkitzeren, Joxan Tolosaren eta Elena Azpeitiaren kontakizunarekin.
Endesa Ligaren azken jardunaldia izango da kirol munduan eguneko bigarren arretagune nagusia. 18:00etan hasita, Dominion Bilbao Basketek Unicajaren aurka jokatuko duen norgehiagokaren berri emango dute Xabier de la Fuentek, Josean Aldalurrek eta Juan de la Vegak ETB4n eta eitb.eus-en.
Palak eta herri kirolek osatuko dute igandeko kirol eskaintza. 12:00etan, Munduko Pala Txapelketako 3. eta 4. postuak zehazteko partida izango da ikusgai ETB4n: Zubiri-Imanol / Landeta-Brefel. Iñigo Aiestaranek egingo du kontakizuna Koldo Larrinagarekin batera.
16:00etan, ETB1eko herri kirolen tartean, Eusko Label sarian, Azurmendi eta Erasun aizkolarien arteko finalerdian gertatutakoak ekarriko dizkigute Ibon Gaztañazpik eta Joxe Etxebestek.
