telebista
Gaur
Buruz Buruko finala eta San Miguel Ligaren hasieran, zuzenean, ETBn
A.A.
EiTB
Bilbao Athleticek Cadizen aurka jokatuko duen partida garrantzitsua ere eskainiko da.
Kirol eskaintza bete betea dakar gaur Euskal Telebistak. Aimar Olaizolak eta Mikel Urrutikoetxeak jokatuko duten Buruz Buruko finalaz gain, estropaden San Miguel Ligaren hasieran egongo da ETB, Malagan; eta Bilbao Athleticek jokatuko duen partida garrantzitsua eskainiko du.
Ohi denez, Euskadi Basque Country Banderarekin abiatuko da San Miguel Liga. 11:45ean hasiko da Malagan jokatuko den estropadaren emanaldia ETB1en eta eitb.eus-en. Mikel Olazabal, Ibon Gaztañazpi eta Sara Gandara arduratuko dira kontakizunaz.
Eguerdiko 12:00etan jokatuko da Cadiz-Athletic B, Bigarren Mailara igotzeko 3. kanporaketaren itzulerako partida. ETB2n eta eitb.eus-en jarraitu ahal izango da, Xabier Anduezaren, Juanan Larrañagaren eta Iban Bengoetxearen ardurapean.
Iganderoko pilota hitzorduak Buruz Buruko Txapelketako final handia dakarkigu, Aimar Olaizolaren eta Mikel Urrutikoetxearen artean, Bilboko Bizkaia pilotalekutik, ETB1en eta eitb.eus-en. Jaialdia 17:00etan hasiko da Elezkano II-Ladis Galartza / Irribarria-Merino II neurketarekin; hirugarren partidan, Rico IV-Iza eta Dario-Merino I izango dira nor baino nor gehiago. Xabier Euzkitze, Joxan Tolosa eta Elena Azpeitia izango dira esatariak.
Hiru zuzeneko hauez gain, beste hiru emanaldi izango dira egunean zehar: ETB1en, 16:00etan, Euskadiko Harrizulatzaileen Txapelketan gertatutakoak bilduko ditu Ibon Gaztañazpik Javier Santamaria lagun duela.
ETB4n, goizean, 12:00etan, Bizkaiko Herriarteko Txapelketako palako finalen berri emango dute Pedro Mari Goikoetxeak eta Patxi Ziskarrek. Iluntzean, 20:15ean, erremonteko Promozio Txapelketako finala izango da ikusgai: Ansa II-Zubiri / Segurola-Larrañaga. Juanan Legorburu eta Manuel Arrizabalaga Matxin izango dira berriemaileak.
leak.