Gorka-Jaka Lau T'erdiko Promozioko finala, gaur, zuzenean

ETB1ek eta eitb.eus-ek zuzenean eskainiko dute Gorka-Jaka Lau T'erdiko Txapelketako Promozioko finala igande honetan, Logroñoko Adarraga pilotalekutik. Ohi denez, arratsaldeko bostetan hasiko da 'ETB Kantxa' saioa, Xabier Euzkitzek gidatuta. Bertan izango dira baita ere Joxan Tolosa aditua eta Elena Azpeitia elkarrizketak egiten. Partida nagusiaren aurretik eta ondoren eskuz binakako bi neurketa jokatuko dira: Berasaluze II-Untoria / Ezkurdia-Merino II eta Jaunarena-Merino I / Victor-Larunbe.

Goizean, 12:00etan, zuzeneko beste emankizun bat izango da ETB1en eta eitb.eus-en, 'Oreka' saioaren barruan: Bera Bera-IUVENTA Michalovce eskubaloiko emakumeen EHF Kopako itzulerako partida, Jon Ander Gorospek eta Jose Inazio Altubek egingo dute kontakizuna zuzenean Donostiako Josean Gasca kiroldegitik.

Herri kirolen tartea birritan zabalduko du ETB1ek igande honetan: lehenengoa, goizeko 11etan, Albizuri Harria Txapelketa eskaintzeko; bigarrena, arratsaldeko lauretan, aizkolarien eta harrijasotzaileen Banakako Kopako jardunaldia eskaintzeko. Ibon Gaztañazpi izango da esataria bi emanaldietan. Arratsaldekoan, Anjel Arrospide izango du lagun.

Azkenik, ETB4n, 20:30ean, Binakako Erremonte Txapelketako 4. jardunaldiko norgehiagoka izango da ikusgai: Etxeberria IV-Etxeberria II / Uterga-Olazar. Iñigo Aiestaran izango dugu berriemaile Manuel Arrizabalaga Matxin lagun duela.