Gotzon Mantulizen aurka arituko diren lau ausarten bila ari gara!

Ausartuko al zinateke 'El Conquistador del Fin del Mundo'ko irabazle baten aurka lehiatzen? Urtarrilaren 15ean horretarako aukera izango duzu, desafio batean.

Laster, ‘El Conquistador del Fin del Mundo’ saioaren edizio berri bat estreinatuko da eitb.eus-en eta ETB2n; hamairugarrena dagoeneko, eta oraingoan, 'El Conquistador del Caribe' izango da.

Hori dela eta, ekitaldi berezi bat antolatu nahi du EiTBk: Gotzon Mantuliz saioaren bosgarren edizioko irabazlearen eta herritar kementsuen arteko desafio bat. Gotzon prest dugu lurrean zein uretan egingo diren conquis estiloko probetan lehiatzeko. Orain haren aurka arituko diren lau herritar adoretsu behar ditugu.

Desafioa urtarrilaren 15ean izango da, igandea, 12:30ean hasita, Bilboko Itsas Museoan.

Ausartuko al zinateke? Lau kementsu horietako bat izan nahi al duzu? Sar zaitez Conquis saioaren webgunean eta igo ezazu zure aurkezpen bideoa. Aukeratuetako bat zu izan zaitezke! Bideoa horizontalean grabatuta egotea eskertuko genuke. Bertan zeure burua aurkeztu beharko zenuke eta zergatik parte hartu nahi duzun kontatu. Parte hartzeko 18 urtetik gorakoa izatea derrigorrez bete beharreko baldintza da.

Bideoak bidaltzen parte hartuko duzuen guztion artean, tablet bat zozkatuko da. Desafioan parte hartzeko aukeraketa bideoaren edukiaren arabera, ikustaldien arabera eta sare sozialetan izan duen zabalkundearen arabera egingo da. Eta aukeratuek sari berezi bat izango dute: 150 euro balio duen txekea, Errekamendi kirol dendetan erabili ahal izateko.

Urtarrilaren 10a arteko epea daukazu bideoa bidaltzeko. Orduan jakingo dugu zeintzuk izango diren Gotzonen aurka aritzeko aukera izango duten lau ausartak.