'Unidos en la distancia' dokumentalaren estreinaldia

Ostiral honetan ETB-2ko ''La Noche de Crónicas'' saioan Unidos en la distancia dokumentala estreinatuko dute. Extremadurako Valencia de las Torres herritik Galdakaora 50. eta 60. hamarkadetan etorri ziren 1.000 etorkinetako batzuren esperientzia eta bizipenak bildu ditu lan honek.

Aurretik, bezperan, Galdakaon aurkeztuko dute dokumentala. Bertan, Jaiver Ibaizarraga Hezkuntza zinegotziak, Julian Pavonek ETBren izenean eta Israel Sanchez Prieto dokumentalaren zuzendariak hartuko dute parte.

Unidos en la distancia

50. eta 60. hamarkadetan Galdakaok Badajozko Valencia de las Torresko 1.000 etorkin hartu zituen. Horietako talde batek euren bizipenak, esperientziak eta hasieran izan zituzten trabak azalduko dituzte kamera aurrean. Lan egiteko gogoz eta bizimodu hobea bilatzeko asmoz etorri ziren.

Gaur egun galdakaotarrak sentitzen dira guztiz, baina ez dute jaioterria ahazten eta lotura estua dute Extremadurarekin.

Gabriel y Galanen poema baten bidez, dokumentalean dualtasuna erakutsi nahi da: bi paisaia, bi aberri eta 800 kilometroko distantziak banatzen dituen bi herri anaitu.

ETB eta Uveuve Extremadurak ekoiztu dute Unidos en la distancia, Canal Extremadura TVren laguntzaz. Israel Sanchez Prieto da zuzendaria.

Israel Sanchez Prieto

Israel Sanchez-Prieto 1984. urtean hasi zen lanean Europa Press agentzian, erreportari grafiko gisa. Ondoren TVEren Kantabriako lurralde-ordezkaritzan aritu zen. 1989an bere kontura hasi zen erreportari grafiko eta argazkilari lanak egiten zenbait agentzia eta telebistetarako (EFE, ITN, Telemadrid, TVE, ABC, Canal Plus, ARD, tv eta Telecinco).

1993. urtean Telecincon programa zuzendari eta egile lanetan hasi zen. 1997an bere kontura jarri zen berriro. Besteak beste, TVEko ''Las Claves de Balbín'', ''Documentos TV'' eta hemengo eta kanpoko beste telebista kate batzuetan egin zuen lan:

Filmografia:

UNIDOS EN LA DISTANCIA (2010)
SIEMPRE DIAS AZULES (2005)
VIVIR EN SINGULAR (2003)
LA HIEBA DE LA DISCORDIA (2002)
EL ENCUENTRO (1999)
TIERRA DE PALESTINA (1995)

''La Noche de Crónicas''en mahai-ingurua

Unidos en la distancia dokumentalaren ondoren, Ander Landaburuk gidatutako mahai-ingurua izango da saioan, ohi denez. Oraingoan, Xabier Aierdi, soziologo eta EHUko irakaslea; Fernando Landa, Galdakao eta Valencia de Torres anaitu ziren garaian Galdakaoko alkate izandakoa, eta Ernesto Rodriguez, Extremadurako etorkin eta Galdakaoko Udaletxeko zinegotzi ohia hartuko dituzte.

''La Noche de Crónicas'' ostiraletan dago ikusgai 22:00etan ETB-2n.