telebista
Saio bereziak
Kataluniari buruzko programazio berezia, gaur, ETBn eta eitb.eus-en
EiTB
Goizetik gauera, Kataluniako egoeraren jarraipen berezia egingo dute ETBko saio eta albistegiek.
-
'En Jake' saioaren atal berezi bat. EiTBren bideo batetik ateratako irudia
Gaur, Euskal Telebistako saio eta albistegiek bertatik bertara jarraituko dute Kataluniako kaleetan bizi den egoera, goizeko lehen orduan hasi eta gauera arte luzatuko den programazio bereziarekin. Kataluniako prozesuaren epaiaren ondorengo mobilizazioekin bat eginez, greba orokorrerako deialdia egin dute ostiralerako Kataluniako sindikatuek. Halaber, ANC eta Omnium elkarteek antolatutako 'Askatasunaren martxak' ostiralean iritsiko dira Bartzelonara.
ETB2n, Xabier Lapitzek aurkeztutako 'En Jake' saioa 09:00etan hasiko da. Leire Torre eta Maitane Bastida kazetariak Bartzelonatik arituko dira berri ematen. Maria Suarez kazetaria, berriz, Madrilen egongo da.
Arratsaldeko 'Qué Me Estás Contando' saioa ere ohi baino luzeagoa izango da, 17:20tik 20:15era arte. Arantza Ruizek eta Ion Aramendik aurkeztutako saioak bertatik bertara jarraituko du Bartzelonako kaleetan bizi den egoera, eta Odei Esnaola eta Xabier Ormazabal berriemaile bereziekin bat egingo dute.
Gauean, 'Especial En Jake Catalunya' saio berezia izango da ikusgai 22:15etik aurrera, ETB2n. Xabier Lapitzek gidatu eta zuzendutako saioak egun osoan gertatutakoaren kontakizuna egingo du eta zuzenean jarraituko du Kataluniako kaleetako azken ordua.
'Gaur Egun' eta 'Teleberri' albistegiek Olatz Simon, Eli Zunzunegi eta Julen Etxebarria kazetarien eskutik jasoko dute Kataluniako egoeraren berri. Berebat, ETB1eko 'Egun On Euskadi' eta 'Ahoz Aho' saioek ere adi-adi jarraituko dituzte gertakarien nondik norakoak.
Asteburuan, Kataluniatik datorren informazioari tarte zabala eskainiko diete Euskal Telebistako albistegi zerbitzuek, eta igandean, '360º' saio berezia eskainiko da Bartzelonatik zuzenean. Eider Hurtadok zuzendu eta aurkeztutako saio horrek azken egunetan Katalunian gertatutakoaren analisia eskainiko du, gonbidatu ezberdinen laguntzarekin.
Eitb.eus webguneak gaiaren minutuz minutuko jarraipena egiten jarraituko du. Halaber, ETBko saio eta albistegi guztiak zuzenean eskainiko ditu streaming bidez.
