telebista
Asteazken honetan
Patro eta Cosmeren arteko ezkontzarekin agurtuko da 'Operación Comète'
A.A.
EITB
Gerra ostean girotutako fikzio lanaren azken hiru atalak eskainiko ditu ETB-2k.
"Operación Comète" telesailaren azken hiru atalak izango dira ikusgai asteazken honetan, 22:05etik aurrera ETB-2n. Patro eta Cosmeren arteko ezkontzarekin esango du agur gerra ostean girotutako fikzio lanak. Manuelek proposatuko die ezkontzea, jaiotzeke dagoen umeak aita bat izan dezan.
Bestalde, Aranaren bidez jakingo du Mateok Ezkilaren ama nor den eta ezkontza egunean, Patroren baimenarekin, elizako sakistrian, denen aurrean kontatuko du nola jaio zen Ezkila. Horrela apaizaren irainak mendekatu nahiko ditu.
Juan eta Bernardek ere hainbat gertaera biziko dituzte "Operación Comète" telesailaren ondarrean. Juanek duelu baterako deituko du Bernard, Beatriz emaztearekin besarkatzen ikusi ostean. Juan Bernard hiltzera doanean, honek esango dio anaiak direla. Juanek ez dio sinestuko, baina une hartan Manuel eta Irene agertuko dira eta Juanek dena ulertuko du. Geroago Miren eta Beatriz iritsiko dira, eta nor bere bidetik itzuliko dira etxera, egiaren jabe.
Desagerturik zegoen Florentino ere bizirik agertuko da azkenean Larraldetarren etxean. Baina bere azken mugalari lanean Gestapokoek atxilotuko dute.
