telebista
Igandetik aurrera
Agirretxe eta Koikili, 'Finlandia'ko denboraldi berria estreinatzeko
A.E.
EITB
Ainere Tolosa eta Aitziber Garmendiak aurkeztuta, Anjel Alkainek, Mikel Pagadizabalek, Jon Iraolak, Egoitz Lasak, Mikel Laskurainek eta Asier Sotak parte hartzen duten umore showa.
Bideoak (1)
Igande gauetan, 21:30ean, emango da denboraldi honetan 'Finlandia' umore showa ETB-1en. Urriaren 9an etorriko da bueltan, Ainere Tolosa eta Aitziber Garmendiak aurkeztuta, Anjel Alkainek, Mikel Pagadizabalek, Jon Iraolak, Egoitz Lasak, Mikel Laskurainek eta Asier Sotak parte hartzen duten saioa.
Kurtsoa estreinatzeko gonbidatuak ere garrantzitsuak: Imanol Agirretxe jokalari txuri-urdina eta Koikili Lertxundi zuri-gorria izango dira solasean eta platoko atal ezberdinetan parte hartzen.
Desapiyua ere badakar 'Finlandia'k denboraldi berri honetan. Olaberriako Karting zirkuitoan jokatuko da beti Desapiyua eta hainbat herritako koadrilek hartuko dute parte. Probak motorra eta gasolina gustuko dutenen partaidetza eskatzen du. Izan ere, egin beharreko konplexu anitz izango dituzte garaile ateratzeko.
Tarte berriak
On Timek ETBrentzat egiten duen 'Finlandia' saioa pertsonaia ezagun askorekin ez ezik, tarte berriekin ere badator. Igandeko saioan 'Aire Aire' saioa ekarriko dute gogora. 'Goenkale'ko kontuei buruz arituko dira Jose Mari Iriondo (Pagadi) eta Ainhoa Goikoetxea (Alkain) oraingoan, aspaldiko 'Aire Aire' programa parodiatuz.
Ze ai oteye? tarte berria estreinatuko dute halaber. Nola ibiltzen ote dira famatuak bizitza errealean? Alegia, nola eskatzen du kreditu bat Freddy Mercuryk? Edo zer egiten du Mikel Olazabalek sagardotegian? Nola atrakatzen ote dute banku bat Perurenak eta Olasagastik? Horrelako egoera berriez profitatzeko aukera izanen da aurten 'Finlandia'n.
Horrez gain, Joseina Etxeberriak atal berri bat izango du. Irratiko 'Di-da' saioaren ordezkari gisa, Gaztean martxan jarri duten Lip-dub lehiaketaren nondik norakoak erakutsiko ditu 'Finlandia'n: lehiakideek bidali berri dituztenak, iazko onenak, baita munduko Lip-dub onenak ere.
Kerman Mintzalagun Bila bereziak ere ez du hutsik egingo. Aste honetan tenisean ahaleginduko da: Kermanek tenis partida bat jokatu nahiko du, baina euskararekin dituen zailtasunak ikusirik, larri ibiliko da jokaldia amaitzeko.
Jon Iraola Iraola Tecnologies-ekin itzuliko da: XBOX 360+ kinect saskibaloi jokoa aurkeztuko du, bi gonbidatuak lehian jarriz. Ondoren, asteroko Start Party-an ere arituko dira Leire Martinezen marka gainditu nahian.
Ikasturte honetan bi gonbidatu izanen direnez programa oro, lehian jarriko dituzte. Oraingoan sumo txapelketa burutu beharko dute Koikilik eta Agirretxek. Helburua Aitziber borroka eremutik botatzea izango da.
Eriz Magoa ere programan izango dute bere truko eta magiarekin eta, nola ez, amaitzeko Konjuntuba izango da. Bonny M-ek 'Mandubin' abestuko du aste honetan.
'Finlandia' igande honetan izango dugu ikusgai 21:30ean ETB-1en.
