Esketx eta pertsonaia berriak, 'Finlandia' saioan, igandean

'Finlandia'rekin hitzordua izango dugu datorren igandetik aurrera ere ETB-1en, gaueko 21:30ean. Esketx eta pertsonaia berriak izango dituzte denboraldi honetan. Horrez gainera, Aizpea eta Barbara Goenaga hartuko dituzte gonbidatuak igandeko saioan Ainere Tolosak eta Aitziber Garmendiak. Gonbidatuekin solasean aritzeaz gainera, esketx eta atal ezberdinetan parte hartzen ikusiko ditugu.

Esketx berrien artean, Artekarik tartean pilota partiduetan apustuetako arduradunak diren artekariek frontoietatik alde egin dute eta eguneroko bizitzan apustuak egiten hasi dira. Egoera arraroenetan azalduko dira. Horrez gain, Asintxo & Julian, 'Finlandia'ko sagardotegiko jabea eta bere morroia, platoan sagardotegia jarri eta gonbidatuekin txotx egingo dute. Halaber, Tzanpionza-n Mikel Olazabalek eta Xabier Azkargortak kirol bideoak eta kirola ez direnak komentatuko dituzte.

Axkolayak ere jardunean arituko dira orain ere, lagun berriekin. Joxe Mari Olasagasti eta Iñaki Perurenaren koadrilan sartu eta beraien lokalean gertatzen diren komeriak ikusiko ditugu. Oraingo honetan, Rufino eta Floren Nazabal lagun izango dituzte.

Mintzalaguna izeneko tartean, Armando euskaldun berria da eta mintzalagun berri bat jarri diote euskaraz hitz egin dezan.

Gaijartzaile atalean, bertso txapelketetan gaia jartzen ibili ondoren kaleetan aske dabil Gaijartzaile, edozein egoeratan gaia jartzeko prest. Jendeak, noski, bertsoa abesten erantzun behar du.

Horrez gain, Axier Muniainek ere bisita egingo du saiora astero. Muniainek Baietz atalean, Axier Muniainen zarauztar kuadrilaren abenturetan jarraituko dituzte. Saltoak, surfa, ur motoak... denetik ikusteko aukera izango dugu.

Eriz magoa ere saioan izango da bere joko eta magiarekin.

Aktore lan-taldean, besteak beste, Anjel Alkain, Xanti Ugalde, Mikel Laskurain, Jon Iraola, Jon Plazaola, Egoitz Lasa, Mikel Pagadizabal, Ana Elordi eta Asier Sota arituko dira.