Julian Iantzik 'Kantuan' show musikala aurkeztuko du larunbatetan

'Kantuan' saio musikala estreinatuko du ETB-1ek apirilean, Julian Iantzik aurkeztuta. Kantuan egitea eta musikan aritzea gustuko duten guztiei dago zabalduta programa berri hau eta larunbat gauetan izango da ikusgai.

Astero-astero, Julian Iantziren eskutik, Euskal Herrian arrakasta handien izan duten kantuak ekarriko dituzte gogora 'Kantuan' saioan. Rantxerak, baladak, euskal musika, habanerak, zein azken hamarkadatako pop-rock nahiz dance estilotako hit handiak. Guztiek izango dute lekua tarte berri honetan. Eta estilo bakoitzak emandako kanturik entzutetsuenak zuzenean entzuteko parada izango dute ETBko ikusleek kantari talde gazte baten eskutik.

'Kantuan' parte hartzeko

Saioak deialdi irekia egin du, gainera, bertan parte hartzeko. Kantua gogoko duen guztiak bertan parte hartzeko aukera izango du: "kantuan egitea, ahots polita edo musika munduan leku baten bila dabilen guztiak parte hartu dezakete". Argibideak jasotzeko 943011793 telefonora deitu edo saioaren helbide elektronikora idatz dezakete.

Era berean, Euskal Herriko aurpegi ezagunak ere kantuan ikusiko ditugu ETBko programa berri honetan. Astero, gonbidatu berezi baten laguntza izango du Julian Iantzik platoan. Elkarrekin, musika estilo bakoitzeko kantarik minenak gogora ekarriko dituzte. Eta, nola ez, euren gustu musikalen berri eman ondoren, kantuan arituko dira gonbidatuak ere, programako abeslarien laguntzarekin.

Euskal Herriko musika talde eta bakarlarientzat ere bada lekua ETBko saio musikal berri honetan. Astero, musika talde batek euren kantaririk berrienak taularatuko ditu eta, horrez gain, Julian eta bere gonbidatuekin solasean arituko dira; musika, betiere, protagonista izango delarik.

ETBk eta 3Koma ekoiztetxeak egindako saioa izango da 'Kantuan'.