Olentzero musikala, gospel doinuak eta Xabier Leteren omenezko kantaldia, gaur, EITB Median

Eguberri eguna behar bezala ospatzeko, emanaldi berezi sorta ederra prestatu du EITB Mediak gaur gauerako. Olentzero izango da lehen protagonista, gospel doinuak izango ditugu ondoren, eta Xabier Leteren omenezko Loreak eta zauriak kantaldia, amaitzeko.

Olentzero Gasteizen

Mulixka dantza taldearen hirugarren ikuskizuna da Olentzero, aro zaharreko pertsonaia mitologikoa eta gaur egungo pertsonaia magikoa uztartzen dituena. Ehun lagun baino gehiago bilduko dira Gasteizko Iradier Arenako oholtza gainera, musika, dantza, kantua eta antzezlana uztartuko dituen emanaldia eskaintzera. Gasteizko dantza taldeko kideekin batera, Eresia orkestra eta Araba abesbatza arituko dira. 

Gospel doinuak Donostian

Victoria Eugenia antzokiko Club aretoan Goiko Gela eta Ispirit taldeek eskainitako emanaldi ederraz gozatzeko parada izango dute ikus-entzuleek. Santi Romano, Olatz Otxoa, Karlos Etxaniz eta Jon Imanol Etxabek osatzen dute Goiko Gela taldea. Abesti propioek eta euskarazko gospel klasikoen egokitzapenek osatzen duten euren errepertorioa. Bestalde, Lidia Insausti, Noa Egiguren eta Lide Hernando dira Ispirit taldeko buruak. Indarrez eta erritmoz beteriko emanaldiak eskaintzen dituzte, gospeleko emakumeen ahots eta soul abestiekin. Bi taldeetako zuzendari den Iñaki Miguel izango dute lagun pianoan, Andoni Etxebeste baterian, Xabier Barrenetxea baxuan, Javier Echarri gitarran eta Antxon Sarasua organoan. 

Loreak eta zauriak. Xabier Leteri kantari

Joserra Senperena (pianoa), Xabier San Sebastián (ahotsa eta gitarra), Beñat Gaztelumendi (bertsoak) eta Quico Pugès (biolontxeloa) dira Loreak eta zauriak ikuskizunaren egileak. Xabier Leteren heriotzaren 10. urteurrenean, haren omenezko diziplina-arteko emanaldia sortu zuten. Haren kantuak gogoratzeaz gain, bere kantuen eta melodien bidez gaur egun bizi dugun jendarteari begiratuko diote. Bertsoz, kantuz eta hitz lauz, 70eko hamarkadatik 2020ra, bizitzatik heriotzara, "ni"tik "gu"ra eta Xabier Letetik gugana bidaiatuko dute.