Bardoak 2012ko finalaren atze-aurreak, Luzerekin, 'Hitzetik Hortzera'n

Miel Mari Elosegi Irurtia Luze Leitzako bertsolaria izango du alboan asteon Jon Artano Izetak 'Hitzetik Hortzera'n. 'Bardoak 2012' ekimenak Leitzan izan du finala zein amaiera festa eta horretaz arituko dira nagusiki. Leitzako Amazabal pilotalekuan Rimak Exkaxko, Bilixkorriko eta Erauntsi taldeko bertsolariek egindako lanetik onena erakutsiko dute.

Erramu larunbat bezperan Bergarako frontoian kantatu zieten Maialen Lujanbio, Ainhoa Agirreazaldegi, Amets Arzallus, Andoni Egaña eta Miren Amuriza bertsolariek Josu Goikoetxeak jarritako gaiei. Hango on aurkiak ere izango dira programan. Zuri-beltzeko Auspoa atalean Bakarne Urreagak Uztapideren Lengo egunak gogoan lanetik egingo du irakurketa. Endoian jaiotako bertsolariaren oroitzapenetatik mutil-koskorretan gazteleraz ikasi zezan Zurbanora bidali zutenekoak hautatu ditu Urreagak.

Goiburu, Aldatz eta Goñi Zappingean

Baten faltan bi Zapping izango ditu HHk oraingoan: lehendabizikoan 1991ko martxoan Etxalekun grabatutako irudi zirraragarriak Anjel Aldatz eta Luzia Goñi bertsolariei egindako omenaldi batekoak. Bigarrena Florentino Goiburu hil berri den Idiazabalgo bertsolari handia omentzeko erreskatatutako pieza da. 1990eko uztailean Elgoibarren Goierriko bertsolari kuadrillak egindako bertso-western afaria. Goibururekin batean ziren han kantari, Zeberio, Begiristain, Iraola, Mendizabal eta Igartzabal.

Bertso-Sopar lehiaketa martxan

'Hitzetik Hortzera'ren Facebook-eko horman jarrita daude dagoeneko Bertso-Sopar lehiaketan parte hartzeko erantzun beharreko puntuak. Maiatzaren 12an Bartzelonako euskal etxean izango den bertso afaritan, Agin Rezolak eta Igor Eortzak kantatuko diete Jone Uriak jarritako gaiei. Bi lagunentzako asteburu pasa ederra irabazteko punturen bati bideoz erantzun eta HHko horman jarri besterik ez da egin behar... eta gero zozketan zorte pixka bat izatea.

'Hitzetik Hortzera': Launbat bazkalostean, 'Gaur Egun'en ondoren, ETB-1en, eta aurretik ikusgai eitb.com/nahieran-en.