Umeen garapenari erreparatuko diote 'Teknopolis' saioan igandean

Umeen garapenari erreparatuko diote aste honetan 'Teknopolis' saioan. Atarrabiako Paz de Ziganda ikastolan ikasle txikienentzat programa berezi bat dute martxan. Lau eta sei urte bitarteko umeak gertu-gertutik aztertzen dituzte. Sei urterekin haur-hezkuntza amaitu eta lehen hezkuntzara salto egin behar duten haurrek ziklo berria inolako arazorik gabe hastea da behaketa-lan zorrotz horren helburua. Eskola-porrotari aurre egiteko prebentzio-lana egin nahi dute horrela. Behaketa-lan hori Maria Lopez neurobiologoaren laguntzaz egiten dute. Madrilgo mediku horrek ikasturtean hirutan egiten du bisita ikastolara, zailtasunen bat duten umeen ebaluazioa egitera.

Halaber, birziklatu eta berreralbitzeaz ere jardungo dira saioan. Behin erabilitakoa berriz erabili ahal izateko birziklatzea. Edo hondakinak baliabide moduan erabiltzea. Ingurumena babesteko barneratu beharreko jarduerak dira. Oraindik lan handia dago egiteko, besteak beste, jendea kontzientziatzea, baina bide horretan badira erabilgarriak izan daitezkeen hainbat esperientzia. Ehunak birziklatzea, isolatzeko material moduan erabiltzeko; edo autoen piezak birziklatzea, erregai moduan edo ordezko pieza moduan erabiltzeko. Europar Batasuneko Mostra agentziak egindako erreportajean, hainbat lurraldetan dagoeneko gauzatu diren esperientziak kontatuko dizkigute.

Gertutik tartean Mari Luz Estebanekin egongo dira. Euskal Herriko Unibertsitatean Gizarte-antropologiako irakaslea da hurbiletik ezagutuko duten ikertzailea. Baina, izatez, medikua da bera. Ez zuen bere burua mediku arrunt moduan ikusten eta horregatik, Basauriko Familia Plangintzako Zentro batean hasi zuen ibilbidea. Ondoren, Gizarte Zientzietara salto egin eta ikerkuntzari ekin zion. Gizartearen bilakaera eta aldaketa sozialak dira jakin-mina pizten diotenak, gorputza eta maitasuna muinean hartuta.

'Teknopolis' igandean ETB-2n 08:55ean dago ikusgai, ETB-1en 14:55ean eta asteazkenean ETB-3n 22:55ean.