Patxi Lopezi egindako 30 galderak

30 euskal herritarrek Patxi Lopez PSEko lehendakarigaia zuzenean galdekatzeko aukera izan dute ETB-2ko ‘Euskadi Pregunta’ saioren hirugarren edizioan.

Hona hemen Lopezek erantzun behar izan dituen 30 galderak:

1. Rodolfo Laiz (Bilbo, 61 urte, merkataria)

- Demokrazian aurrenekoz, EAJ oposizioan egon da. Zein da zure balantzea? Konstituzionalisten arteko Gobernua apurtu zenuten, eta horrek hauteskundeak aurreratzea ekarri zuen. Hauteskunde hauek galdu egingo dituzue, seguruenik. Berriro ere zeharkako akordioak prestatzen ari al zarete?

2. María Claret (Errenteria, 51 urte, funtzionarioa)

- Zergatik eman diezue bankuei horrenbesteko boterea? Gu gara banku horien oinarria; gure aurrezkiekin, bankuen sostengua izan gara.

3. Ion Baskaran (Sestao, 33 urte, Laneko arriskuen prebentzioko teknikaria)

- Kargu publiko bat lortu ahal izateko, hautagaiek aurretik enpresa pribatuan lan egin behar dutela uste duzu?

4. María Luisa Sánchez (Donostia, 59 urte, Hezkuntzako funtzionarioa)

- Atez ateko sistemaren aurka kanpaina izugarria egin du zure alderdiak Gipuzkoan, nahiz eta gaikako zabor-bilketaren portzentajeak % 80ra iritsi diren. Katalunian, berriz, beste alderdi batzuekin batera, bultzatu egin duzue sistema hori. Interes ekonomiko eta politikoak nahasten eta modu txarrean jokatzen ari zaretela uste al duzue?

5. Eduardo Inclán (Gasteiz, 37 urte, irakaslea)

- Zure Gobernuak ez du ezer egin seme-alabak gaztelaniaz hezi nahi dituzten gurasoei laguntzeko. Zergatik?

6. Iñaki Eguibar (Irun, 55 urte, funtzionarioa)

- Gure gizartean gero eta barneratuago dago Euskadira datozen etorkinei ateak irekiko dizkiezula, baina ikasketak eta formazioa duten euskal gazteak eta beharrak dituzten nagusiak alde batera utzi dituzue. Ez al da horrela?

7. Natalia Gardeazabal (Bilbo, 45 urte, irakaslea)

- Zure alderdiak Suresnesetik egin duen ibilbidean, PSOEk Autodeterminazio Eskubidearen alde egin zuen. Zein da zure jarrera? PSCko zenbait kidek dutena edo Konstituzioaren "zilegitasuna" defendatzen dutenena? Zure erantzunean ihes ez egitea eskatzen dizut; ez iezadazu esan herritarrentzat bigarren mailako gaia denik, mesedez. Mila esker.

8. Ana Holguera (Bilbo, 44 urte, psikologoa)

- Hezkuntza edozein gizarteko oinarria izanik, zer egin dugu gaizki noberbarenak ez diren ideien aurkako jarrera intoleranteak agertzeko? Erlatibismoa eskolatik bultzatu beharko genuke?

9. Josu Revuelta (Gasteiz, 58 urte, langabea)

- Lehendakari jauna. Aurrezki kutxetako administrazio kontseiluetan, politikariek parte hartu behar dutela uste duzu? Ez al duzu uste toki horietan ekonomian adituak egon behar dutela?

10. Leticia Del Campo (Bilbo, 34 urte, administraria)

- Zein da zure iritzia futboleko euskal selekzio baten inguruan?

11. María Luisa Santirso (Etxebarri, 52 urte, etxekoandrea)

- Lopez jauna. Osasungintzan ezarritako murrizketak Euskadin ere egingo dira?

12. Juanjo Pedrero (Bilbo, 41 urte, enpresaria)

- Zer iritzi duzu drogak legeztatzeari buruz?

13. Nando Anguiano (Gasteiz, 41 urte, langilea)

- 2012ko abuztuaren 31rako, iaz baino lan-erregulazio gehiago aurkeztu dira Euskadin: Lan-erreforma saihesteko eta enplegua sortzeko, zein neurri jarriko dituzu martxan?

14. José Luis Pelícano (Donostia, 64 urte, langabea)

- Duela 8 urte BBVAren nire sukurtsaleko zuzendariak, nire aholkulari pertsonalak, produktu bat aholkatu zidan. Haren arabera, interesak ematen zituen funts baten antzekoa zen, eta dirua 24-48 ordutan ateratzeko aukera izango nuen, nahi izanez gero. Produktuak Eroskiko Menpeko Ekarpenak du izena (lehentasunezko partaidetzaren antzekoa da), eta 15.000 euro baino gehiago jarri nituen bertan. Urte honen hasieran, nire saldoa erdia baino txikiagoa da, eta, nire sukurtsaleko zuzendariarekin hitz egitera joanda, Eroskiren Menpeko Ekarpenak biziarteko produktua direla esan dit, eta egin ahal dudan gauza bakarra merkatuko prezioan saltzea dela, bertan jarri nuen diruaren % 40 jasotzeko gaur egun. Zein iritzi duzu gai honi buruz, eta zein irtenbide emango zenidake, hori aurreztuta nuen diru guztia zela eta langabezian nagoela kontuan izanda?

15. Aitana Fuster (Bilbo, 20 urte, ikaslea)

- Zure Gobernuak ETArekin amaitu duela esan duzu. Benetan sinesten al duzu hori?

16. Saioa Castañeda (Gasteiz, 32 urte, langabea)

- Legealdiaren hasieran ingurugiroaren inguruko erreformak egingo zenituztela esan zenuten; besteak beste, animaliak babesteko legeak. Agindutakoa ez zenuten bete, eta Espainiako Aurrekontuetan Arabako fracking putzuak egiteko partidak onartu dituzte. Bizkaian ere halakoak egingo dituzuela entzun da. Gasa erauzteko modu hori kaltegarria izan daiteke ingurugiroarentzat eta pertsonen osasunarentzat. Zein jarrera du PSE-EEk fracking-aren inguruan? Hurrengo lehendakaria izatekotan, zein izango da zure jarrera?

17. Ieltxu Armendariz (Bilbo, 27 urte, langabea)

- Rodolfo Aresek zergatik ez du zigor politikorik jaso Ertzaintzak Iñigo Cabacas auzian izandako jokabidea ikusita? Ares Jaurlaritzatik joan da, eta ez du erantzukizunik hartu bere gain Kukutzan eta Errekaldeko anbulatorioan ere egindako kargengatik. Zergatik?

18. Federico Gil (Bilbo, 47 urte, lantegiko langilea)

- Gorabidek 50 urte bete ditu, eta, epe horretan, adimen urritasun bat dugunok gizartean gure eskubideak onartzea lortu dugu. Baina hori teoria baino ez da, praktikan urritasun bat duten pertsona askok ezin baitute botoa eman. Zer egingo zenuke egoera horri buelta emateko?

19. Mari Mar Fernández (Donostia, 49 urte, administraria)

- Enpresa batek langabean dauden pertsonak kontrata ditzake behin eta berriro lanpostu bera betetzeko, baina enpresaburuak ezin dira behartu langile horiei kontratu finkoa egitera. Zergatik? Legezkoa da, baina ez etikoa.

20. María Paz Fernández (Gasteiz, 75 urte, erretiratua)

- Lopez jauna. Legearen barruan osatutako Gobernua indarrez kentzeko saiakera baten aurrean, segurtasun indarrak erabiliko zenituzke? Eskerrik asko!

21. Mikel Agirregabiria (Getxo, 59 urte, erretiro teknikaria)

- Urriaren 21etik aurrera hezkuntza arloan aplikatuko dituzun politika nagusiak azaldu, mesedez. Lau urtean lortu nahi dituzunak eta 2020 edo 2030 urteetarako lortu beharrekoak zerrendatu.

22. Juan Carlos García (Gasteiz, 28 urte, enpresaria)

- Ekainean, Eusko legebiltzarrak Euskadiko Ekintzaileei eta Enpresa Txikiari laguntzeko Legea onartu zuen. Lan bat baino gehiago dituzten autonomoentzat Gizarte Segurantzan % 50eko hobaria ematea ezartzen du horrek. Autonomoen erregimenean alta eman duten autonomoen baldintzak hobetzea aurreikusten duzu? Herbehereek eta Erresuma Batuak formula hori erabiltzen dute enplegua sustatzeko.

23. Lina Ugarte (Donostia, 36 urte, komunikazio aholkularia)

- Bankuetako buruzagiek jasotzen dituzten pentsioak ez al zaizkizu lotsagarriak iruditzen?

24. Jara Velasco (Irun, 24 urte, ikaslea)

- Ikaslea eta langabea naiz. Telebistan ekonomian aditu asko ikusi ditut krisiari buruz hitz egiten, baina ez dute irtenbiderik ematen. Bankuei buruz hitz egiten dute, ez gazteen egoerari buruz, nahiz eta kaleetan protesta ugari izan. Gazteen egoerak ez luke toki handiagoa izan beharko hedabideetan?

25. Julio de Mingo (Ezkerekotxa, 55 urte, langilea)

- Politikariei euren pribilegioak kentzeko ausardia izango al duzue?

26. José Antonio Echeverria (Donostia, 62 urte, entrenatzailea)

- 14 urtetik beherakoek Euskadiko federazioetan lizentzia lortzeko baimena emango zenuke? Federazioetan eta eskoletan aldi berean lizentziak egiteko aukera emango zenuke? Kirol talde eta elkarteek kirolariak kanpotik ekartzeko diru-laguntzak jasotzen jarraituko dute?

27. Alex Cerdeño (Basauri, 58 urte, langabea)

- Justizia pertsona guztientzat berdina dela uste duzu?

28. María P. Blanco (Portugalete, 25 urte, museoko gidaria)

- Urdaibaiko Guggenheim museoaren aurka egin zenuten. Zergatik?

29. Juan Antonio Etxebarria (Portugalete, 63 urte, irakaslea)
- Lanpostu bat lortzeko, tituluak, masterrak eta abarrekoak izan eta hizkuntzak jakin behar ditugula esaten diguzue. Hori zuzena da. Baina, zer gertatzen da politikariekin? Herri baten buruzagiak zarete, ez enpresa bateko zuzendariak. Orduan, zergatik ez duzue hori guztia arautzen? Zergatik politika munduan aritzen zaretenek ez dituzue goi mailako ikasketak eta masterrak izan behar edota euskara eta ingelesa menperatu behar?

30. Clara Llanos (Donostia, 52 urte, etxekoandrea)

- Zer gertatzen da Euskal Herriko memoria historikoarekin?