Futbola, herri kirolak eta erremontea, larunbatean, ETBn

Larunbatero legez, Bigarren B Mailako futbol emanaldia egingo dute ETB-1en eta eitb.com-en 17:45etik aurrera. Alaves-Real Sociedad B derbiaren ingurukoak Xabier Anduezak, Juanan Larrañagak eta Joseba Urkiolak ekarriko dituzte zuzenean.

Zuzeneko beste emanaldi bat ere izango da, ETBKn hain zuzen ere, areto futboleko ligari dagokiona: Puertollano-Rios Renovables. 13:00etan hasiko da, Xabier Andueza eta Juanma Ordozgoiti esatarien eskutik.

ETBKn jarraituz, 12:30an, piraguismoko Gaztelako sariaren laburpena egingo du Juanan Legorburuk; 18:30ean, automobilismoko Europako Nascar Txapelketaren Valentziako finalerdiaren ingurukoak bilduko ditu Iñaki Mikeok; 19:30ean, Elgoibarren jokatutako arraza libreko Euskadiko Artzain Txakur Txapelketaren kontakizuna egingo du Koldo Aldalurrek, eta, azkenik, 22:30ean, Oñatz-Zubiri / Otaegi-Barrenetxea IV erremonte partida jarraitu ahal izango da, Iñigo Aiestaranen eta Iñaki Agirrezabala Matxin-en komentarioekin.