Gernikako urriko azken astelehenari buruzko saioa berezia, ETB-1en

Urriko azken azokak esanahi berezia du gernikarrentzat eta oro har, bizkaitar guztientzat. Azoka berezi hori ardatz hartuko du Euskal Telebistak 'Lunes Gernikes, golperik bez' erreportaje berezia izango baita ikusgai, Urko Aristik gidatuta.

23:15ean hasiko da, 'Lunes Gernikes, Golperik Bez' erreportajea eta Gernikako astelehenen famatuenak ezagutuko dituzte, urriko lehenengoa eta azkena.

Urko Aristik gidatutako saioak Gernikako azoka barru barrutik ezagutuko du. Azokan postuak jartzen dituzten baserritarrekin egongo dira, gazta lehiaketaren ingurukoak bilduko dituzte eta talorik onena jaten den postua topatuko dute.

Horrez gain, Pirenaika arrazako txapelketako irabazlearekin, Jon Koldo Bikandirekin, eta Ordiziako gazta txapelketa irabazi zuten Puy Arrieta eta Jon Etxebarria zeanurriarrekin izango dira.

Gernikara doazen baserritarren bilgune den Boliña Zaharra jatetxean sartu irtena ere egingo du Urko Aristik. Hamaiketakoa egin edo patxadaz bazkaltzeko aukeratu ohi duten lekua da hain zuzen.